Da: U C. Pynsakhiat Yeini Kyndiah
I naam i pyrtuid ka chnong Jwai da bna,
Wada pynkha ko yow Khlawait wa paka.
Datip chooh ya ka ha kini ki sngi,
Ka Headquarter yong ka District waroh kawi.
La kylli ka nachwa ileh man kamni?
Tyrseiñ kawa ynne wow jubab yeini.
Ileh wabooh ke heh mo yei naam yong ka?
Ch’bot khlieh kawa ynne, takor ka nachwa.
Kat nangboon tylli ki snem walai,
Nanghiar dor i naam ka chnong Jwai.
U dak kylli u waheh dooh,
Uwa yang hakhmat ya kiwa pyndooh.
Yaam rem piah nood ki manchwa longchwa,
Wa im ka juk wache hei saja.
I naam ka chnong Jwai da bna katni,
I JHEP I JHEP bait man-ka-sngi.
I jhep i jhep pynsihdur yeiwa miat,
I jhep i jhep waroh wa ya pait.
Ha Iawmusiang da yoo ma wa kyndong,
Lakat u loom bah boo bah kong.
Yi won wow khat yi won wow pynlang?
Cheiwon u linoh waboon ki wakhang.
Kat wym ye u pynkhreh daki buit thymme.
Yi hi theit wow chah yi hi theit wow e.
Kani mo katæ ka sor Jwai wa ong ki?
U dak kylli ya waroh hi.
Khlem beiñ khlem kynnoh yei yi yei yi,
Kwah heh u tip ileh jia kamni.
Hoi hi mo wow ong waka sor toh kani?
Wow booh mot dei jhep ha skit pyrdi.
Da’u tylle pasi ham booh ha r’dang,
Ya chah sympat ha ki waseiñ wadang.
