U Montri wa pait ya ka chnat puræ puthi, u Lahkmen Rymbui da ong wa i kaam sikai wa i kaam saiñhima sima ym toh iwa kreh bang ja, tangwa toh ki kaam wa hap wow em i kitkhlieh. Ya ini u Montri da ong u hawa pynksan hajrong i pynbna wow khang ya kiwa sikai wow chimbynta ha ki kaam saiñpyrthai.
Da ong u wa i kaam sikai wa i kaam saiñpyrthai em ki jar jiar i emkaam wa i kaamram, heiwa da ong u wa ka sorkar jylla ha ka 5 tarik u Wisu (March) uni u snem da pynkylla (Amend) biang ya ka Service Rule yong kiwa sikai ha ki skur wa yoh bhah wow pynlai katkam ki kyndon na ka sorkar. Da ong wa ki School Managing Committee leh ki pynsñiaw ki wa i kaam sikai em ko i kitkhlieh yong ki hi.
U Rymbui da ong u wa ka sorkar ym em khang ko ya kiwa sikai wow yakhun ya ki Election lane wow kreh ya ki kaam saiñhima sima, tangwa lada kwah ki, hap ki wow jied bait du iwi i kaam, deiwa pynsñiaw wa oo leh kam u sahep sorkar hadooh 19 snem, tangwa da ieh noh u yei kaam neibhah kwah u wow kreh noh ya i kaam saiñpyrthai.
