Jowai: Haka jylla Arunachal Pradesh, ki pulit ka Miao kawa man leh ka Sub-division ha Changlang District haka kani ka tayaw da yoh kem ki le ngut kiwa khayi drug wa kynthup ya kawi kawa dai bhang. Kani ka Sub-Division toh kawa em kamwa 25 km naka jylla Assam.
Haka 18 tarik uni u bnai, ki pulit ka Miao wa yahkhmat da u Officer In-charge, Inspector Ege Ete wa u Sub-Inspector J. Aran da kem ki 3.5 Kg u bhang naka Fatima Begum kawa em 36 snem.
Kani ka bru toh kawa da leh ya ini i kaam kattu da boon snem wei da dai bhang ko cha ki khynnah skur, kiwa boon toh kiwa sah ki nong Tibet ha Chophelling Settlement kamjooh ki tre chnong wa em ha kani ka thaw.
Haka 21 tarik won katkam wa pyntip u Sub-Divisional Police Officer, Miao, Dy. SP Tasi Darang, da kem ya uwi uwa dai drug na chnong Longtom-I (Namphuk Nallah) kawa em hapoh ka Kharsang Circle.
Ki pulit hadien wa yoh yutip ki wa tikna da khynra ki ya i yung u Nar Bahadur Tamang, uwa naka chnong Namphuk Nallah wei da chem ki ya 12 tylli ki yusong wa suba toh i Brown Sugar wa khia 5 gram.
Hadien wa pynman yaka takit da chem wa ya ini i drug da yoh naka thaaiñ Bordumsa wei uwa chah kem da phla u wa oo leh pynemkaam drug u wei dai u leh heijooh i por.
Haka 23 tarik won ki pulit ka Miao Police da kem ki ya u Indong Gam Singpho uwa khut siñ kam u Kalagam na thaaiñ Garaline, najan ka Government Higher Secondary School, Miao uwa dai drug ha kani ka chnong.
Ha kani ka sngi heipor 7:30 i miet hei yahkhmat u Sub-Divisional Police Officer Dy. SP u Tasi Darang wa u Officer In-charge, Inspector u Ege Ete, da yoh kem ki ya 12.30 gram i Brown Sugar (Adulterated) na i yung uwa dai drug iwa da murieh u.
Ha jylla Meghalaya won haka 19 tarik uni u bnai katkam wa pyntip ki pulit, ki dkhot ka VDP ka Umlyngka, Upper Shillong, da kem ki ya u Wanaibok Kharumnuid wei da e kti ya oo cha ki pulit. Hadien wa yah u ki ki pulit cha yung wa sah u ha 4th Mile, Pynthor, Upper Shillong, ki pulit da chem ki ya le tylli ki thyrnia wa 9.09 gram wa suba toh i Heroin.
Haka 21 tarik won heipor 3:45 noh chariñ ka sngi hadien wa yoh yutip wa tikna ki pulit, da ksoh ki ya kawi ka kari kamai Local Taxi wa em ya u number ML-05R-1435 hajan Ganesh Das Hospital, Shillong heiwa da em le ngut ki bru ka Ribica Misao, u Soilen Hajong wa u Surendra Banai.
Hawa kynreh ya kani ka kari, ki pulit da chem ki 3779 tylli ki dawai kuli Amphetamines kiwa khia 384.19 gram.
Discussion about this post