Ka lympung kawa 16 ki Khynnah Seng Khasi Seiñraij da pynman ya ka ynne ka sngi ha chnong Mukhap, West Jaiñtia Hills District wei da man ko kawa lai bait lai ryntih deilang ki kyndon pynrkhiñ ka sorkar wow yada naka khlam COVID-19, heiwa napyrdi ki 20 tylli ki Circle hapoh kani ka lympung da e laad du 5 ngut donhi ki khynnah wow wan ki na kawi ka Circle deilang kiwa yahkhmat kam chibynta u pynduna i boon paaid.
Chwa u sdang yaka lympung lehkmen, ka Seng Khynnah Seng Khasi Lawbah da ekti ko yaka Dongmusa chaka Seng Khynnah Seiñ Raij Mukhap wei da wai leh ya u moo sahnaam ka lympung kamjooh u moo sahnaam yaki bru wada e yarap sñiawbha da u MLA ka thaaiñ u Nujorki Sungoh wa u MLA ka Jowai u Wailadmiki Shylla.
Da wan sakhi lang ya kani ka lympung da u MDC ka thaaiñ u W.G. Sungoh, u Dolloi ka Elaka Raliang u C. Lyngdoh wa kiwi.
U Nujorki Sungoh hawa e yei klam da kyntu u ya kiwa yahkhmat kani ka lympung wow rap pynpsiah ki hei thij i pyrkhat ki khynnah hajrong i emkaam i tip i stat, neibhah wa i stat toh ka spah wa khroo ha ki khynnah kiwa man ka mynried ka ri.
U kongsan yong kani ka sngi u Paiem Ainam Manik Syiem, u Syiem ka Hima Mylliem hawa e yei klam hajrong ka phang “Ka jingiaineh hapdeng ka jingkylla jong ka por” da pynkynmoo u wa heipor wa synchaar ki dohlieh yaka ri Ynñiawtrep Ynñiaw Skum da pyrchang ki wow pyntkut noh yei ngait Niamtre niam Khasi.
Wei ong haroh u wa hapoh i synchar kiwa nabaar da yoobeiñ yei ngait tre ri khlem ka yurim wa biang, wei hapyrdi i pyrchang ki dohlieh da yoh ki leh u khriñ yaki khon Khasi khara deiwa kylla niam Christan ki.
Hapyrdi i lai luti kam kiwa ngait hei Niamtre ong u wa da pyrchang ki u pdiah thylliej ya jar ka niam ka jaitbru heiwa ka Seinraij, Seintyllilang, Seiñkyntu Niamtre, ki seiñ wa heh wa kiwi chnat yong ka Niamtre da e ki yei sikai niam.
Kamtæ i neh ha kani ka niamtre niam Khasi wot hapyrdi i kylla i por da man i kyrkhu wa khroo yaka jaitbru, heiyatoh u tip yaka dustur riti, ong u Paiem Ainam Manik Syiem.
Kyntu haroh u yaki khynnah wymtoh u elaad yeiwon iwon i pynbiej wa boonjait tangwa toh u neh haka niamtre kamwa da sikai ki manchwa.
Kiwi won wa e yei klam kynthup ki ya u President ka Lympung ki Khynnah Seng Khasi Seinraij u Puramon Kynjing, u Sheini Wett, President ka Seiñraij Mukhap, u Akbarlang Synteng Nongdhar naka Seng Khynnah Seng Khasi Mawwan, Mylliem Pyllun uwa da klam hajrong ka phang “Ka jingiadei ka kmie bad ki khun”, ka H. Ymbon naka Laskeiñ Pyllun kawa da klam hajrong ka phang “Hala thymmei ban tei ka lawei”, najrong kiwi won.
Da em leh i puræ ktien tymmen, ki lehke Drama, i rwai, i chaad ha kani ka sngi.
Neitæ ha kani ka sngi da saam leh yaki khusnaam cha kiwa jop hei yakob waphær waphær wada pynman haki 20 tylli ki Circle.
Ha kani ka sngi u Pyniaidsuk Lyngdoh, General Secretary ka Lympung ki Khynnah Seng Khasi Seinraij, da pynbna paidbah haroh u wa neini chakhmat daw sdang noh i e sikai yaki khynnah haki chnat seiñ waphær waphær ka Bri U Ynñiawtrep wa kynthup heiyatoh waka ñiam ka rukom, ka tem ka put, i rwai i siaw, ki yalehke Sports wa kiwi kiwi won ki kaam chibynta u pynku yei sap ki khynnah kamjooh leh i tip yaka niam ka rukom.
Da pynkut yaka lympung deiwa pynhiar lama wei ekti yaka Dongmusa chaka Seng Khynnah Seng Khasi Krang, Diengiei Pyllun neibhah ha u snem 2023 ka Lympung u man ko ha katai ka chnong.
