Uwi na ki COVID-19 Volunteer, u Riki Mukhim da pyntip u wa ynnin ka sngi 23 tarik, chirup deilang waki bru sorkar da lai li pait li sylli ki ya waroh ki dukan ha chnong Nongtalang wei da phah leh yaki dukan wa toh u booh ryntih ki yei dor marbaam deiwa biah haphrang dukan yong ki katkam wa da hukum ka sorkar jylla.
Da ong u wa neiliang yong ki da pyrchang ki u yaklam yaki tre dukan dei luti wa jai jai wei ya kitu won ki dukan wym em yohlaad ki u yaklam, da yaklam ki waki waheh chnong Nongtalang waka Nongtalang Mission wow pyntikna ki wa ki dukan toh u bood ryntih ki yaka hukum ka sorkar. Wei neini chakhmat yaki tre dukan wym kohngooh, ka bor yong ka aiñ daw leh ko yeiwa emkaam.
Tangwa hajrong ini i pyrchang yong oo kam u Volunteer deilang waki bru sorkar wow kyntu yaki paidbah u bood ryntih yaki hukum sorkar, da wan won ka khubor wa pynsñiawsih ya oo neibhah du hadien kattu katni kynta wa wan pyndep u yei kamram, yoh u ka khubor naki paidbah wa em ki tre dukan kynnoh kylla ki oo kut jait kut sker.
“Man ko kayi kayi wa pynsñiawsih kthang ya nga wa du hadien kattu katni kynta em ki bru paidbah wa khana ya nga wa em napyrdi ki dukan wa kynnoh ya nga kut jait deiwa ong leh nga toh uwa lorni. Hawa kylli won O na ki paidpah kiyi kitæ ki tre dukan, tangwa ym nood ki u khana yei pyrtuid ki tre,” ong u Riki Mukhim.
Heiyatoh wa ini, pynche u wa ki tre dukan wym toh u sñiawthooh bakla ki næ mutdur sih wei pynbaad kut jait wa pyrchah, wa atnood wa lorni, neibhah ini i leh yong ki toh neibynta i miat i bha u paidbah waka imlang sahlang waroh kawi khnang wa u paidbah ha kam kini ki por ym kulmar yumut ki. Wei heijooh i por leh yow ye u yakhun pyrchah yaka khlam COVID-19, toh dei ya ksohktilang yong waroh, wei emkaam leh u e yutip wa che cha u paidbah nadooh ki dor marbam mardih wa kiwi kiwi.
Discussion about this post