U Montri Rangbah warim ka jylla, u Dr. Mukul Sangma uwa da phiah ya ka Congress deiwa yahlang wa oo 11 ngut ki MLA yow pynyabi wa ka TMC ynnin ka sngi, da ong u wa ini ym toh iwa da leh jhan tangwa iwa da dep pyrhat yillu bha.
“I thong yong i toh wow chem ya ka Party kawa ye u em ha waroh kawi ka India, kamtæ da poi cha ka laad wow psiah noh cha ka TMC,” da ong u Dr. Mukul hawa yaklam wa ki laad pathai khubor ynne ka sngi.
U Dr. Mukul uwa jooh man uwa yahkhmat ka Congress Legislature Party (CLP) da ong u hawa yaklam wa ki para MLA hapoh ka Party da pynsñiawthooh yeiwa jia hapoh ka Congress katni.
Da ong u leh wa i sur paidbah katni da emkaam ya ka Party hapoh ka ri kawa ye wow yieñ pyrchah.
“Ini toh neidaw wa ka Congress da tlot ko wei kam kiwa em hei liang pyrchah da yieñ i wow leh yeiwa emkaam,” da ong u Dr. Mukul.
Da ong u wa hei thooh yong oo ya ka Party ka wow mih salan heithaw ka Congress, da yachem u wa u Prashant Kishore na ka Indian Political Action Committee (IPAC) heiwa ha ini i yachem da chem wa em ki i jooh i thrang wa i thong.
U Dr. Mukul da ong u wa kam kiwa mihkhmat paidbah ym em ye ki wow leh katkam wa toh u leh wow chakri ya ka jylla.
“Da ini da chem yei thaw wa lait, da rai wow pynyabi noh wa ka TMC,” da ong chooh chooh u.
Da kular u leh ya ki paidbah wa deiwa em wa ka TMC daw em ki laad wa khlan wow yoh yei pdiang ha waroh kawi ka ri.
