Shillong: U Montri kaam pohyung ka jylla, u Lahkmen Rymbui uwa man leh u MLA ka UDP, da ong u wa i pynbaad wa i em i khayi mooyong pyrchah yaka aiñ ha ka jylla toh du wow pynmylliñ ya i bhah kaam thymme ha ka sorkar da ki seiñ saiñ pyrthai wa synrop lang ha ka sorkar MDA.
Da ong u wa kamwa man kattæ, du ka UDP wa yakrehlang ha ka sorkar kawa ym em i thmu wow kylliang chuki hapyrdi ki MLA ka Party.
Ha i jooh i por kam u Montri wa pait yaka chnat pohyung (pulit), u Rymbui da ong wa em ka chaniah kawa skem ha i krehkaam ki pulit, heiwa da kyntait u leh wa hadooh kattæ wa em i chalan pyrchah yaka aiñ ya u mooyong hapoh ka jylla, wei ki kari wa kit ya u mooyong toh kiwa da pynbiang ya ki kot ki sla.
Kam wow kdaw heini wa da em ka yakhih na ki Montri ha ka sorkar MDA wow dawa na u Montri Rangbah, u Conrad K Sangma wow pynsangeh ya ki kaam khayi pyrchah yaka aiñ ya u mooyong hapoh ka jylla neibhah wa da wanrah ya i dooh nong ya ka muna tyngka yong ka jylla.
Hawa yaklam wa u Symbood Montri Rangbah u Prestone Tynsong da kyntait u wa em i khayi næ chalan pyrchah yaka aiñ ya u mooyong wei neiliang ka sorkar da phah ko ya ki DC wa ki SP ha ki District wow paitbniah wei wow khanglaad ya i chalan pyrchah yaka aiñ ya u mooyong.
