Hadien wa ka VPP da sangeh noh ko yei yakhih khang tala ya ka Gate ka JHADC hynne i janmiet mar ya yoh i pyntikna na u Deputy CEM wa ka tulop kiwa kreh neibynta chibnai dapoi ko ha ka Council, da yoh laad leh u yaklam wa u Lasky Rymbai kam u Deputy CEM, deilang wa u EM, u Moonlight Pariat kiwa da pynche hajrong i yakhih wa da pynman da ki MDC VPP wei kamjooh hajrong ka tulop kiwa kreh ka JHADC.
U Lasky Rymbai da ong u wa ka Executive Committee hapoh i yahkhmat u Thombor Shiwat ym em chong kli kti hi-eh ko, tangwa kreh ki yei kaam wot heiyatoh wow pynyoh tulop ya kiwa kreh.
Heiyatoh wa i mih yakhih ki MDC ka VPP won ong u chong ha ki hi la pyrchah næ ym pyrchah ki leh, tangwa i kaamram yong ki won kam ki MDC wa em i kitkhlieh neibynta kiwa kreh ka District Council, ki da thooh ki ya ki laad ki luti kammon u pynyoh tulop ya kiwa kreh.
Pyntip haroh u wa ka poisa neibynta chibnai ka tulop yong kiwa kreh ka Council dapoi ko hynne i janmiet.
Heiyatoh wa i slem yoh tulop khana u i daw hi toh wa da thooh laad pynkylla thymme yei rukom su ymtoh de kam yongrim khnang yow lai smat i kaam.
U Moonlight Pariat won da ong u nachwa ya ka bhah yong ka Council na ki mar pohkhyndaw da phah cha ka sorkar jylla, ka sorkar won hap lai luti ko ar sein ya kamwa 23, 24 tylli ki meij yow yoh ya ka mang poisa. Neitæ na ka sorkar daw phah cha ka Treasury wei na ka Treasury u phah cha ka Treasury Jowai neini won u poi cha ka Bank yow yoh kiwa kreh ka District Council.
Tangwa katni da yaleh u pyntbian noh yeini i rukom su heiwa waroh ki chnat wa yatoh bynta wa ka District Council wa kynthup ya ka Mining, Forest, Transport neini chakhmat u pynpoi bait ki ya ka poisa ha DCA, na ka DCA u lai bait cha ka Bank wei ini daw pynsmat ko yei kaam.
Da ini i rukom, u Moonlight Pariat yooluti u leh wa nadooh u snem thymme katkam i yaklam i rukom su tulop u man noh kawa lai bait man-u-bnai.
Chooh chooh hawa pynsñiaw u yei lai luti hajrong kani ka kaam, u Moonlight Pariat khana u wa da pynlut por da dohyap ki neibynta u chong pyrkhat wei yaleh u thoh u pynwandur ya ki kyndon chwa u phah cha ka sorkar. Neitæ dadep yachem ki wa ka Committee kawa da chna hapyrdi u DC wa ka sorkar.
Da e kti ki leh ya ki kot ki sla wa da thoh ya ki kyndon weiwa u DC leh du hapoh arsngi da pynpoi u ya ka Report cha ka sorkar jylla wei na itæ i daw tæ smat kani ka kaam.
Tangwa du neidaw wa chimpor ka System ha ka sorkar tæ yoh laad noh kini ki Party VPP u pynman yakhih ynne ka sngi.
Chooh chooh da pynrap u deiwa ong hei sakhiat hi ki MDC ka VPP leh da tip hiki wa ka poisa da lai luti ko wei ym slem de u poi ko haka Council, tangwa du neidaw wa kwah burom kam ki Oposition chim kabu noh ki da kani ka luti.
“Kam ki Oposition jar ka luti wa kwah ki u lai, u lai bait ki, wei i leh kiwa kreh chitom hanlada pynman yakhih næ ym pynman yakhih ki leh, kreh bait i yei kaam kamwa toh i kaamram u kreh i,” pynkut u Moonlight Pariat.
Discussion about this post