U Montri Rangbah ka jylla, u Conrad Sangma da kular u wow pynkut yei ya e kylliang yei bordiñ wa kiwi manda kut uni u bnai ha ka 30 tarik.
Hawa yaklam wa kiwa thoh khubor yeiwa da pyntip u wa katni da ye wow pynmih da jan dap 4 Million Unit chi sngi, da ong u wa 2 Million Unit da hap wow su kylliang cha ki Company wa pynmih bordiñ wa da chim ka jylla yei bordiñ ini wa dep heipor wa duna bordiñ.
Da pynche u wa katni wa da pahooh i bordiñ, hap wow pynuiñ yei bordiñ wa da chim heipor wa duna bordiñ wei daw chim biang na ki heipor wa duna bordiñ kam ha u Kmaichonglad (Dec) hadooh u Naitung (Apr) kiwa man ki por wa duna slap wei ini toh katkam wa da dep pynbait nachwa.
Da ong u wa katni won da pynkylla yeini wei da dep wow ya soi soskular MoU waka NTPC yow chim kylliang yei bordiñ yow lait u hap leh kam nachwa iwa da chem chitom bha. Da ong u leh wa ka NTPC wa ki bru yong ka kiwa chemphang kiwa pait ki yei rukom pynmih hapoh ka ri wei hadooh cha baar ri daw yarap ki ya ka jylla wow pynpliah yei rukom pynemkaam yei bordiñ yow lait u sepai.
Da pynkynmoo u leh wa kamwa man kattæ waroh ki kor, ki Unit, ki Stage pynmih bordiñ ka jylla toh kiwa krehkaam waroh deilang khlem em kawa sih wei ini da yarap ko ya ka MeECL wow sdang u yoh nong hei sien nyngkong deiwa ye leh wow dai yei bordiñ.
Kamtæ da pynche u wa ini daw yarap ko manda duna slap leh wa daw em poisa yow thied bordiñ wei lada hap pyndooh bordiñ leh man ko du 1-2 kynta chi sngi heithaw 8-9 kynta chi sngi kam ini wa dep heipor wa duna bordiñ iwa da ktah bha ya ki paidbah wei.
Chooh chooh da ong u wa ka sorkar da dep ko wow ong wa daw pyndooh bordiñ hi dei miet 2-3 kynta i wym pynthut ya ki paidbah.
Puræ leh: Soi soskular ka sorkar Meghalaya waka NTPC yow pynbha yei rukom pynmih bordiñ
Discussion about this post