Ka lympung yalehke wa tip kam ka 6th Meghalaya Games kawa daw pynman ha uni u bnai ha Jowai, da lai bait i pynkhreh chaaid chaaid yow pynman noh ka.
Ha Madan Biar Dulong daw pynman ya ki yalehke Traditional Games namo ki yalehke tynre wei hapoh ka Yungwalieh won toh ka Karate.
Neiliang u Ladwan Dkhar uwa man u Secretary ka Dulong da ong u wa i myntoi wa da yoh deiwa wan kani ka lympung toh wa ya ka Yungwalieh da niaam rong ya ka wei iwon iwon iwa jæd wa pai da chna pynmiat ki nadooh ki dwar wa ki yit.
Chooh chooh da ong u wa heiyatoh wa ka madan da kular ki wow pynmiat wow pynmanad ka heiwa kiwa at kiwa thlu daw ah daw pyndap ya ki wei itæ man iwa dang sah wei katkam wa man kattæ dang chna ya ki dara wow man kam ki Office neibynta ki yalehke ka lympung.
U Raymond Nartiang uwa man u Executive Member ka chnong da ong u wa hajrong i pynmiat ya ka Yungwalieh da chna leh ya ki sarok psiah namo ki Approach Road naphrang wa na chrooh ka Yungwalieh.
Heijooh i por da ngaitskem u wa kiwon kiwon kiwa da tei wa da wanrah nadooh ki tiar ki tar neibynta ka Meghalaya Games manda kut kani ka lympung leh wow neh hi ki kam ki yong ka chnong ka thaw khnang wow yoh ki khon khynroo khyllood u pynemkaam ya ki hadien wow pynpliah ki ha ki jait yalehke Sports.
Ka chnong da sñiawburom ko ya ka sorkar wa da wanrah ko ya kani ka lympung ha ka chnong wa ka thaaiñ wei ngait yooluti ko leh wa ki kaam yalehke u man kiwa lai bait khnang yow mih ki wow wanrah naam ya ka chnong ka jylla.
Discussion about this post