Ynne ka sngi ka HITO-West Jaiñtia Hills District hapoh i yahkhmat u Secretary yong ka, u Crissence Ksoo, u Yoomeki Passah wa ki dkhot ka seiñ da lai pait ki ya ka Namdong CHC.
Neiliang ka seiñ da chem ko chiboon i tkoh kani ka thaw sumaar heiwa da ong ko wa da pynku kyrdan ya ka du i ktien donhi katwa ki kaam won man ki mar dei kangtleiñ.
Da chem ko wa ka kor ECG, X-Ray waka Ultrasound leh ympu em ki wei wot ki Nurse leh em ki du san ngut wei wot ya kiwa da chah kyrriah leh ympu em wa thap hei thaw yong ki.
Chooh chooh da chem ko wa em du 3 ngut donhi ki Doctor kiwa toh u em 6 ngut wei ki thaw thiah leh em du 26 tylli (13 tylli ki General wa 13 tylli ya kiwa kha khon), wot ka Ambulance leh ym em ha kani ka thaw wei kawa em katni leh man ko kawa da rim kawa ye u thut chiteiñ luti lada kit ya kiwa chitom.
Ka seiñ da ong ko wa da chem ko wa kani ka CHC ympu em ko ya u sarok psiang wow lai cha ka wei na ini i daw da beiñ joor ko ya ka sorkar yei pynku kyrdan ya kani ka thaw sumaar du wow yoh Vote heipor Election donhi.
Neiliang ka seiñ da dawa ko na ka sorkar wow pynbiang ya iwa duna ha kani ka thaw sumaar katkam i emkaam ki CHC khnang wa ki 50 tylli tam ki chnong wa 35,000 ki bru wa toh u pait kani ka CHC u yoh ki yei chakri wa biang.
Discussion about this post