theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

I pynman nong India ya i toh dei bor ym toh dei mon yong i: Samuel Jyrwa 

Ka North East Student’s Organisation (NESO) da pynkhai im biang ko yei dawa wow pyndam ya ka Citizenship Amendment Act, 2019 (CAA) ha waroh kawi ka jylla yong ka Northeast. Ha Meghalaya da pynman ya kani ka yakhih da ka seiñ Khasi Student’s Union kawa man ka dkhot hapoh ka NESO, ha kawa da chimbynta leh da kiwi ki seiñbhalang kam ka FKJGP, HNYF, JSU wa kiwi kiwi.

Ha ka yalang chong kyllaiñmynngor wa da pynman hajan u mot u Kiang Nangbah wa em hakhmat ka Shillong Civil Hospital, da yoh leh yei klam na kiwa yahkhmat seiñbhalang wei kamjooh na u Chairman ka NESO, u Samuel Jyrwa.

Ya kani ka yakhih yong ka NESO da pynman ha waroh ki jylla yong ka Northeast ynne ka sngi yow pynbor ya ka sorkar India wow pynmankaam ya kiwa boon ki dawa wa sahteiñ yong ki paidbah ka thaaiñ. I dawa kiwa ka NESO da booh ko ha kani ka yakhih kynthup i wow yada nei buhai chnong ki mynder ri deiwa pynkrehkaam ya ka Inner Line Permit ha waroh ki jylla Northeast, u pyndam ya ka Armed Forces Special Power Act (AFSPA) 1958 na ka thaaiñ, u pyndam ya ka CAA wei wow pynbait ya u pood u ang wa kiwi kiwi.

U Chairman ka NESO, u Samuel Jyrwa hawa klam ha ka yalang ha Shillong, da ong u wa i pynman nong India ya ki paidbah ka Bri Ynñiawtrep toh dei bor ym toh dei mon ki paidbah. Da ong u wa da pynman nong India ya ki paidbah ka Bri U Ynñiawtrep ha u snem 1948, wei ha ka 9 tarik u Naisaphra 1947, ka sorkar India wa ki Syiem Khasi da soi ko ya ka dulir næ ka ‘Standstill Agreement’ kawa e por ya ki Syiem Hima Khasi ar snem wow pyrkhat wei wow rai pynyabi wa ka ri India lane wow pyrkhat da kamwi won, tangwa du ha ki kajiak bnai ka sorkar India da phah soi yabor ko ya ka Instrument of Accession (IOA) wa ki Hima Khasi lyngba ki ktang suloi.

Uwa yahkhmat ka NESO da ong u wa iwa sñiawsih toh wa ya ka IOA kawa ka sorkar India da phah soi yabor ym bien wow pynkrehkaam wei wow burom yei ya kdohktien ya ki kyndon hadooh katni.

U Samuel da ong u leh wa ki jylla wa em ha Northeast da yoh ki du i chah ban beiñ, chah lehbeiñ wei chah iehbeiñ ha ka sorkar India.

Da ong u leh wa i dawa wow yada ya ka jaitbru, hadooh katni ka sorkar India ym pu e ko ya ka jylla Meghalaya, wa kynthup ya ka ILP wei wow tipmit ya ka ktien Khasi hapoh ka 8th Schedule, tangwa da wanrah pathan da ka CAA kawa kdung ya ya ki khian paaid ha ka niam na kiwi ki ri.

Share this:
Previous

Daw pynman ya ka yalang kiwa kreh ka MeECL 

Next

Da chem ya uwi u chabi kari wa pyndait wa u tyrnem u Thor