Hajrong ka thong u pynsñiawthooh paidbah yei rukom pynlai pynwan yaka poisa poilaiñ lyngba ki kor ki bor katkam ka juk stat wa katni, da pynman ya ka “Financial Literacy Campaign for Promoting Digital Finance”, ynne ka sngi da ka Meghalaya State Rural Livelihood Society (DMMU) West Jaiñtia Hills chirup i krehlang waka Department of Economics, Thomas Jones Synod College Jowai ha chnong Ialong.
Ki bru chemphang wa da wan u batai pynsñiawthooh hajrong kani ka phang kynthup ya u D. Pohtam napoh ka chnat NRLM, wa u A. Pyrtuh, Branch Manager ka Meghalaya Rural Bank Jowai.
Neiliang u D. Pohtam hawa klam khana u wa ka NRLM toh kawa yatoh kaam bha wa ki Self Help Group ha ki chnong waphær waphær wei katni da pynchlur bha ki ya ki paidbah u tip u sñawthooh ki ya ka kaam poisa poilaiñ namo ka Financial Literacy, wei kiwa rap kongsan dooh lyngba ki Bank toh kam ka Savings Account, i phah poisa, i su poisa, i e ram wa kiwi kiwi de.
Neitæ kamwa ka juk lai ko wei i rukom krehkaam leh kylla i, ong u wa emkaam ya ki paidbah u tip u sñiawthooh ki wym du ya kiwa em ha sor tangwa wot kiwa cha palatsor leh kamjooh.
Neiliang u A. Pyrtuh won khana u wa ka thong hi ka sorkar toh wa man kawi pa kawi ka yung toh u jan ko cha ki Bank itæ toh deiwa wai Account ha kawon kawon ka Bank, i daw toh wa katni iwon iwon i myntoi ye u yoh deiwa em Bank Account donhi, wymtoh de kam heipor nachwa.
Hawa batai u ya ki rukom kynchew poisa waphær waphær wa ki paidbah ye ki u yoh myntoi, da khana u leh ya ki Scheme waphær waphær wa ye u yoh na ki Bank wa kynthup ya ka KCC Loan, ka ram neibynta u ri sniang, ri syiar, neibynta u seiñ yei khih seiñ khan wa khian wa kiwi.
Heijoooh i por ong u wa ka sorkar leh da kyntu bha ko ya ki paidbah warep u chim ki yaka ram ki warep neibynta i myntoi yong ki.
Heiyatoh wa i khih namo ka Business, ong u wa ki bru Pnar leh katni da sdang ki u ku, tangwa dang duna won i tip.
Chwa ini ha ka yalang wa pynlai da ka C.D. Tongper, kawa sikai yong ka Department of Economics da yoh leh i klam na ka L. Lytan, Vice Principal ka Thomas Jones Synod College, i klam na ka Rimalia Dkhar kawa sikai yong ka Department of Economics deilang wa kiwi.
