U Awhai Andrew Shullai, MDC ka Jowai Central uwa da jop naka Party Congress, hawa klam ynnin ka sngi haka yalang pynskem ya kiwa kitkaam Block Committee, Meghalaya Pradesh Trinamool Congress yong ka 2-Jowai Constituency ha madan Jrisaleiñ, Jowai wa da emlang u Charles Pyngrope President TMC, u Dr. Mukul Sangma uwa man leh uwa yahkhmat ka liang pyrchah, u George Lyngdoh MLA Umroi wa kiwi, da ong uwa i rai yakhun yong oo naka TMC toh kawa da pyrkhat sani bha wa ki paaid wa kyrchaan kamjooh u Dr. RC Laloo, MLA warim ka Jowai.
“Nga ym sñiawsuk O wow yaleh na ki Party wa embyntalang ha ka MDA neibhah ym em kawi wot leh ka Party wa ye wow sait khooid wa ym embynta ki ha i lehbor ya ki paidbah ha kini ki 5 snem kamjooh leh wa i baamtooh,” da ong u Andrew.
“Nga da jied O ya ka TMC neibhah wa man ko kawa dang khooid wei ka wym em dak sih iyi iyi,” da ong chooh chooh u.
Hawa kdaw yei rukom synchaar ka sorkar MDA nadooh u 2018, da ong u wa da hiar i ar chah wei da yoo leh yei eh ki paidbah hapoh kini ki 5 snem heiwa da chah thombor i hok ki kup chiliang ki sem chiliang.
Da ong u wa ka sorkar katni ym pyrkhat ko wow pynku ya i roi i paar u paidbah tangwa pyrkhat donhi ki kammon wow pynlai tooh ya u mooyong wei wow booh ya ki thaw yakhle.
“I yakhun yong nga ym du wow jop Election tang wow wanrah ya i hok ki paidbah wa i synchaar wa khooid wa iwa salonsar,” da ong u Andrew.
