Hadien wa da booh kyndon wow kdoh u khoom ya ki kaam wa ye wa ki wym ye u leh hapoh ka chnong Jowai nadooh ka 1 tarik hadooh ka 10 tarik uni u bnai, neiliang ka All Jaintia Commercial Vehicle Association hei yahkhmat u President yong ka u Paila Kordor Lyngkot da lai yachem ki wa u Deputy Commissioner yong ka West Jaiñtia Hills yow yoh pynche ya i rukom lai rukom wan wei rukom thap bru ki kari kamai kiwa wan kiwa wan chapoh chnong Jowai ha kini ki sngi.
Heiyatoh wa i rukom lai rukom wan ki kari kamai, ka Association da kyrpaad ko ya kiwa yah kari waroh wow sñiawbha ki wow bood ya ki kyndon wa da pynbna da ka sorkar khamtam heiyatoh wa ki number yong ki kari wa ki sngi wa toh wow lai ki hadooh ka 10 tarik deiwa kyrpaad leh ya kiwa yah kari wow deiñ Mask ki wei lada toh wa dang hoi wow dam u wan cha Jowai ha kini ki tarik wa da khang ya chnong Jowai.
Heiyatoh wa i rukom thap bru ki kari kamai hapoh Jowai wa kiwa wan cha Jowai, neiliang ka All Jaintia Commercial Vehicle Association kwah ko pynche kamni neibhah boon kiwa yah yari ym sñiawthooh ki ka katæ ka 1/4. Kamtæ da pynche wa ini mut ye wow thap bru 25% donhi na iwa jooh thap.
Da pynche leh wa i bai kari u man bait ko hei dor Booking wa da booh da ka sorkar.
Ki kari kamai kiwa lai ‘Emergency’ kam yei kitbru wakjut cha Hospital kiwa lai thooh dawai, kiwa lai tlep bru, kiwa lai bia, neiliang u Deputy Commissioner da pyntikna u ya ka Association wa ye ki wow kit tam ya ka 25%. Kamjooh ya ki khynnah skur wa lai thoh examination leh ye ki wow kit tam ya ka 25% .