Ka Phidalai Toi ynne da rai ko wow ieh noh yei kaam ko kam ka Chairperson ka Meghalaya State Commission for Women wei da phah ko leh yei jubab cha ka sorkar hajrong i paan pynche pyrchah ya ki kaam yong ka.
Da ong ko wa bha wow ieh noh yei kaam bar yow kreh hapoh ka la-ær wa man bih yow lait hi leh u thut i krehkaam ka Commission yow lait leh u mih ki kynrum kynram.
Chooh chooh da ong ko wa i tip ko wa da chah pyndam ko kam ka Chairperson toh lynga ki khubor wa mih ar sien na u Montri ka chnat Social Welfare, u Paul Lyngdoh wei hadien ini poi ka Show Cause Notice na ka sorkar wot hadien wa da yoh yei pynche na ka Commission leh dang khana u ha kiwa thoh khubor deiwa bakla.
Kamtæ ynne da phah ko yei jubab ya ka Show Cause Notice wei daw phah ko leh ya ka chithi ieh noh yei kaam deiwa ong wa da leh ko yeini neibynta i bha i miat tangwa daw yaklam ko leh wa ki muktiar hajrong ini waroh wa da jia yow tip ko kammon u lai luti chakhmat.
Da ong ko leh wa i rukom leh u Montri toh deiwa leh chilliang, iwa yoo beiñ ya ka kam ka kynthai kamjooh wow pynbood naam yei pyrtuid yong ka.
