U Symbood Montri Rangbah ka jylla uwa man leh u Chairman ka Regional Committee wow pynbait ya u pood ka jylla ha Ri-Bhoi, u Prestone Tynsong da ong u wa ha u Naiynñiaw wow wan, ki ar tylli ki Regional Committee, kitæ na ka jylla Meghalaya wa kamjooh na Assam u yachem ki wow yaklam heiyatoh wa i lai chaphrang hei wow pynbait ya u pood ki ar jylla ha ka wat wa ar.
Da ong u wa ha Ri-Bhoi District em ko 3 tylli ki bynta (Sector) wa hap wow pynbait, wa kynthup ya ka Desdomria, Borduar, Nongwah wa Block-II. Da ong u wa i pynbait ya u pood daw man i kamjooh kamwa da leh ha ka bhah wa nyngkong, heiwa da kam u leh wa ka Meghalaya da em lut ki ya ki kot ki sla wow kamtre ya ki thaw ha khappood, wei ya kini ki kot ki sla daw pynyoo leh ha ka Regional Committee yong ka sorkar Assam.
Hawa kylli wa ha ka sien wa nyngkong ym em i hun na kiwa boon, neiliang u Prestone da ong u wa daw em bait i pyrchah wei kamjooh i sñiaw ki paidbah tangwa em kiwa boon leh ki bru kiwa da yaroh yei leh ka sorkar wei ka sorkar daw lai ko chaphrang wow pynbait noh ya u pood lada man katwa man leh neibhah daw man ko i myntoi ya kiwa hadien habood.
Hawa kylli chooh chooh na oo, da ong u wa deiwa che wa heiyatoh waka Block-I wa Block-II ym em i kajia pood tangwa i yaklam wa ka sorkar Assam yow pynpuiñ biang ko ya kini ki thaw cha ka jylla Meghalaya katkam ka Notification yong u snem 1951.
