Khliehriat: U Deputy Commissioner ka East Jaiñtia Hills District da pynbna paidbah u wa khnang wa kiwa chong chnong u ye ki wow thied ya iwa emkaam ki (Essential Commodities) ha ki por wa em ka Curfew ha East Jaiñtia Hills District da pynbait wa ha ka 17-04-2020, 20-04-2020, 21-04-2020, 22-04-2020, 23-04-2020 wa 24-04-2020 lane hadooh wa pynbna da kamwi won, u man ki kamni ha wah:
Waroh ki dukan FPS (dukan rachon) kiwa em hapoh ka NFSA wa Non-NFSA u wai dukan ki man ka sngi yow pyndep yei saam khoo rachon wa dang sah man ka sngi nadooh i por 9 waje i step hadooh 4 waje i janmeit
Ya ki jait dukan wa da pynmih pyrtuid ha wah kiwa chah wow wai yaki dukan yong ki ha ki jar jiar ki chnong ki thaw, ha i por 10 waje i step hadooh 1 waje man ka sngi nadooh ka Monday hadooh ka Friday.
Ki dukan wa chah u wai ha ki chnong toh ki dukan jhoor, dukan soh, dukan doh, ki dukan marbam mardih, dukan dai Mobile Recharge, dukan dai baam dihcha (Confectionery Shop), dukan dai Cosmetic, dukan e la-ær tire kari, dukan dai baam ri mrad, dukan e sumaar ya ki mrad wa ki dukan dai dawai (Pharmacy).
Ya ki dukan Wholesale ha yaw Umpleng (Cement Market) u chah u wai haka sngi Monday, Tuesday, Wednesday wa Thursday nadooh i por 2 waje hadooh 4 waje du neibynta wow yarap ya kiwa thied wa na ka thaaiñ Saipung, Muallian chaneiñ da iwa pynbait wa i phah leh wa pynmih da kane ka Office lyngba ka Order No. NO.EJHD/COVID-19/2020/PT.II/11, Dt. 12.04.2020.
Ya ki dukan Wholesale won kiwa em ha Lad Rymbai, Khliehriat, Sookilo u chah wow wai naka Monday hadooh ka Friday nadooh i por 2 waje i sngi hadooh 4 waje i janmiet wow yarap kiwa wan thied kiwa na ki chnong wa jngai na ki thaaiñ khappood Assam wa Bangladesh katkam i pynbait wa iwa da phah wa da pynmih da kani ka Office lyngba ka Order. NO.EJHD/COVID-19/2020/PT.II/12, Dt. 12.04.2020.
Ya i su bordiñ yong ka MeECL u pynman ha man ki Community Hall yong ki chnong nadooh i por 9 waje i step hadooh 4 waje i janmiet deiwa ya sñiawthooh lang ki bor pynlai chnong wa ka ophis ka MeECL.
Ki Bank ha East Jaiñtia Hills ye ki wow wai nadooh i por 10 waje i step hadooh 4 waje i janmiet yow yarap ya kiwa lai emkaam ha ki Bank deiwa ya sñiawthoohlang, ya krehlang wa ki bor pynlai chnong kiwa haap hapoh ka Service Area yong ki Bank wei wow e yutip wa tikna wa ha ka chi sngi wow wai ya ki Bank du neibynta ki kattu katni tylli ki chnong khnang yow lait na i boon bru wa i khynnia (Cluster of villages approach).
Ki waheh chnong deilang wa ki VDP, ki seiñ khynroo, ki pulit u pynlai ryntih ki yei lai thied yong ki paidbah na ki dukan, i lai emkaam cha Bank wei wow bood ya i pynjngai uwi na uwi kamwa 3 phut (Social Distancing) kamwa da phah da ka sorkar lyngba ka Health Department.
Discussion about this post