Ka Arts & Culture Committee, Seiñraij Jowai da pynsñiaw ko yei sñiawngooh ya waroh kiwa embynta lang ha ka Chaad Sukra 2024, nadooh ki chnong waphær waphæ kamjooh yaka Seiñraij Niamtre Ummulong, ka Seiñraij Niamtre Shillong waka Seiñ Tylli Lang Ladthadlaboh kiwa em hapoh ki thawaner yong ka Bei Seiñraij Jowai, kiwa embynta ha ki chaad nadooh na Madan Mynkoi Pyrdi hadooh hakhmat ka Blai Iaw Blai Syiem, ka Miet Pynwiar ngiah ha Mynkoi Pyrdi Iongpiah, kamjooh ha ka Chaad Uiñrong, kiwa pynman yaka Chaad Sukra 2024 kawa jop ka wahun wasuk nadooh bru hadooh Blai.
Ka Arts & Culture Committee Seiñraij Jowai pynsñiaw ko leh i sñiawngooh kyrpang ya ka Niamtre Committee Tpep-Pale, kawa da pyndep yaka Ialehke Drama ha ka 06-04-24 ka bynta wa nyngkong yong ka Chaad Sukra 2024.
Chooh chooh ka Arts & Culture Committee Seiñraij Jowai e khublei ko ya waroh ki khon yong ka Niamtre kiwa embynta lang ha kani ka Chaad pynemwarom yaka Bei Ramaw, kitbok kitrwiang ko ya phi waroh yow yoh phi dei chait i khiah i mankhih mankhan, i roi i paar ha waroh ki liang, kamwa ngooh wa dem yow kyrkhu ki Blai ki Syiem ya i waroh.
Heijooh i por ka Arts & Culture Committee Seiñraij Jowai e khublei ko yaka Police Department wa pynbait ya ki kari ha ka sngi Chaad Sukra, kamjooh leh waroh ki laad pathai khubor kamjooh ki bru samen kiwa pynpoor ya kani ka Chaad Sukra lyngba ki Social Media ki yong ki.
Ya ka Chaad Sukra 2024 ye ki paidbah u pait ha ka YouTube Channel yong ka Seiñraij Jowai.
Discussion about this post