Ka National People’s Party (NPP) ynne ka sngi da pynskem ko ya kiwa kitkaam ka North Shillong Block wa kynthup leh ya kiwa kitkaam ka Women’s Wing wa Youth Wing. Ini i pynskem ka NPP toh neibynta ka Election MLA ha u 2023.
Ha kani ka sngi da emlang u Dr. WR Kharlukhi uwa man u President ka NPP Meghalaya State Unit kam u kongsan, u kyrtong ka NPP na North Shillong, u Ransom Sutnga uwa da chah pynskem leh kam u President ka Block NPP, ka Dr. Jasmine Lyngdoh, President ka NPP Women’s Wing, u Teiborlanglang Pathaw wa kiwi kiwi kiwa yahkhmat wa kiwa kyrchaan ka Party ha katai ka Constituency.
Ya ka yalang da pynman ha Khasi National Dorbar Hall ha Mawkhar, heiwa u Dr. Kharlukhi da kyrpaad u ya ki paidbah deiwa ong ham pynman ya ka North Shillong kam i sarom ka Meghalaya ha kani ka Election wow wan. Ka North Shillong kawa jooh tip nachwa kam ka Mawkhar Constituency toh u dohnood ka yakhih wow yoh jylla wei da man ko leh kam ka nongmuna ha ka jylla Meghalaya.
Ha iwi i liang, u Dr. Kharlukhi uwa man leh u MP ka jylla ha Rajya Sabha da ong u wa ka yurim wa da sdang ya ka NPP toh wow wanrah yei yatylli yong ki bru ha ka thaaiñ mihsnhi. Da ong u wa ka thong yong ka NPP toh ym du wow jop ha Meghalaya tangwa ha waroh kawi ka thaaiñ mihsngi wow pynyatylli ya ki jaitbru wei wow lai cha Delhi du iwi i sur.
Da ong chooh chooh u wa ka thaaiñ mihsngi em ko 25 ngut ki MP ha Lok Sabha wei hapoh 20 ngut ki MP ha Rajya Sabha, deiwa pynrap wa manda lai cha Delhi ymtoh u lai duna 25 ngut ki MP khnang wa i sur ki paidbah ka thaaiñ u sñiaw ki ha Delhi.
