Kawi ka Video wa da pynpoor bha ki bru ynnin ka sngi ha ki Social Media, heiwa ha katai ka Video da yoo ya uwi u bru wa wan yow dung ya uwi u bru wa chong ha thuk-thuk uwa da yoh wow yut wei da lait u nei mynsoo.
Neiliang u Addl. Superintendent of Police (Traffic), u Ian Onel Swer da khana u wa katai ka Video toh kawa da jia nadooh ka 26 tarik yong u Naisan iwa da jia ha Mahari Petrol Pump, kawa em ha Jaiaw Langsning.
Katkam wa pyntip u Swer, utai u khynroo wa lai dung toh uwa sah hajan katai ka Petrol Pump wei man u uwa em i duna hei bor pyrkhat, heiwa katni dang em u hei chah sumar ha MIMHANS, Lawmali.
Da pyntip u leh wa ya ini i kaam da dep wow pynbait noh da kiwa ha yung wei da dep wow yasuk.
