Ka Hynniewtrep National Liberation Council (HNLC) hawa pynlait khubor u General Secretary uwa man leh kam u Publicity Secretary, u Sainkupar Nongtraw da e kse u boi wa lah u em jar jiar ka jylla neibynta ki jaitbru u Ynñiawtrep.
Da ong u wa lada em i da i yong i hi ka thaw daw ye i wow chna da ka yong i hi ka sorkar wei u yieñ kam kawi ka jaitbru kawa laitlooid. Ha i yong i hi i thaw ye i wow pynmih kreh, wow pynku ya ka khayi pateiñ, u pynemkaam ya ki marpohkhyndaw waka um yow roi u paar.
Heijooh i por da ong u wa ki A’chik leh emkaam ki yong ki hi i thaw wei ym kwah wa ki A’chik wa ki Ynñiawtrep u man kamwa jia ha Manipur wei u man leh kam ki Rohingya lane ki Kurds ki wym em yei thaw yong ki hi.
Da pynche u leh wa ka HNLC ym em kwah ko u tympiah lane wow ya pynyatohlang tangwa wow tipmit ya ka jaitbru ym du ha India kamjooh cha baar leh.
“Kwah i yong i hi i thaw kamwa mantre ki Mizo ha Mizoram,” da ong u Sainkupar deiwa pynrap wa ka sorkar toh u thooh laad ko kammon wow pynyoh yeini neibhah deiwa yoh da i thaw u Ynñiawtrep hi daw pyntikna ko yei im wa i roi.
Heiyatoh wa i yaklam yasuk waka sorkar, da ong u wa da yooluti wa daw man ko kawa jop tangwa ym nood wow kular hadooh katwon u man ko kawa jop neibhah hadooh katni ka yaklam yasuk kawa da yasoi wei kawa da krehkaam toh du ka Mizoram Peace Accord 1986 ym du hapoh ka India wa ha ka pyrthai waroh kawi. Heijooh i por da ong u wa kiwi ki soskular yasuk wa da dep yasoi wa ki seiñ kieñ suloi toh kiwa kut hi-eh kamtu ha ka kot donhi wa ki kular ka sorkar.
Da pynche u leh wa ini i wan yaklam yasuk kiwa yahkhmat ka HNLC ym em mut wa wan pyndem tangwa kwah i wow pynbait ya ki dawa kiwa man neibynta ka jaitbru Ynñiawtrep wei wow tipmit ya ka jaitbru ym du ha India tangwa cha baar leh.
