U Lamphang yong ka yung dorbar chna-aiñ ka jylla, u Metbah Lyngdoh da ong u wa daw bichaar bniah yei mih ki MLA ka Congress heipor wa dang lai ka dorbar kiwa da kbai pyrchah leh ya ka sorkar hapoh baranda yong ka yung dorbar neidaw wym yohlaad ki u yaklam yei dawa pyndam kreh chipor ya ki heh pulit wa emkti hei yap uwa yahkhmat warim ka HNLC.
Heijooh i por u Metbah da ong u wa i pyndam ya ka Short Duration Discussion wa da wanrah da u MLA ka Congress na Mawlai, u Process T Sawkmie hadien wa da pdiang wow yaklam ynne ka sngi, man ko hadien wa da yoh yei thoh na ka chnat Kaam Pohyung yong ka jylla kawa da pynsñiaw wa ka Rule 59 yong i pynlai dorbar ym chah ko wow yaklam ya ini.
U Metbah da ong u wa kam u Speaker eh ko ya oo wow tip iwon wa dang chah takit hapoh ka aiñ namo kiwa man Sub Judice wei kawon kawa man, wei lada e laad ya ki dkhot ka yung dorbar wow yaklam leh daw man ko kawa eh wow pynsangeh, heiwa da pynrap wa iyi wa u Advocate General da e yumut u toh wa ka Rule 59 ym chah ko wow yaklam ya katai ka phang.
