Shillong: U Montri Rangbah ka jylla, u Dr. Mukul Sangma da ong wa i krehlang ki ar tylli ki seiñ ri-loom ka jylla, hapyrdi ka United Democratic Party (UDP) wa ka Hills State People Democratic Party (HSPDP) chwa ka Election, toh neidaw wa kini ki party ym ye ki u yarehlang wa ka BJP neibhah da yoo ki yei rukom krehkaam yong ka.
Da ong u leh wa ini i krehkaam kini ki ar tylli ki seiñ (UDP-HSPDP) da pyn artatien ko ya ka Congress wa da ye ko u man kam ka laad ya ka BJP wow psiah khlieh ko hapoh ka jylla.
U Dr. Mukul da ong u wa i krehlang ki seiñ ri-loom ymtoh iwa thymme hapoh ka jylla neibhah yeini da pyrchang ki nachwa wei ym em sñiaw phylla u yeini.
“I ya tylli wa mih katni toh wa da tikna waka BJP daw yohlaad ko wow psiah hapoh ka jylla neibhah ka UDP da em kti ko wa kiwa boon ki Party kamjooh man ko ka dkhot ko wa ka North East Democratic Alliance (NEDA) kawa yahkhmat da ka BJP,” ong u Dr. Mukul.
“Ka NEDA toh ka dhab ka BJP wei lyngba yong ka, ka BJP mut ko jan daw suk ko wow psiah khlieh cha ka jylla Meghalaya wei da baam jabieñ ko ya ki party ri-loom yow tip ko ya ki buit ki budia wow pynbait ya ki paidbaah yow poi ko cha ka thong yong ka”, ong u Dr. Mukul.
Discussion about this post