U President ka Khasi Students Union (KSU), u Lambokstarwell Marngar da ong u wa kawi na ki phang wa dang sahkut hadooh katni nadooh ki por kiwa yahkhmat warim toh i dawa wow pynkrehkaam noh ya ka Inner Line Permit (ILP).
Kamtæ da kylli u wa lada man i i pap mo yaka jylla wow yoh yaka ILP, deiwa pynrap wa lada ym ye wow e ILP ha kani ka jylla, ileh da pynkrehkaam ya ka ILP ha kiwi ki jylla ka North East.
U khliehdooh ka KSU da klam u ya kini ki kyntien ha ka yalang kynmoo warom ya ka lyngkhooh sngi yap yong u President warim ka KSU, u Bull Lyngdoh. Da ong u wa ka phang ILP toh kawa da sahteiñ nadooh ki por uni uwa yahkhmat khlaad u.
U Lambok da ong u wa ka sorkar jylla ha ka 19-12-2019, da mynjur ko yei rai wow phah cha ka sorkar India wow pynkrehkaam noh yaka ILP, wei pynsñiaw u yei lynngoh wa haddooh katni ka sorkar India dang boonkaam ko wow puræ wei bichaar bniah ya ini i dawa.
Ha kawi i liang uwa yahkhmat ka KSU da kynthah u deiwa khor hajrong ka aiñ yada mynder yong ka jylla, ka Meghalaya Residents Safety and Security Act, deiwa ong wa ka jylla da yoh ko da kiwa kammon kiwa synchaar kiwa yahkhmat wa ya ka aiñ yong ka jylla leh hap wow paan bor na Delhi, wei da pynsñiaw u leh yei long i man wa pynartien ya ka mynried ka jaitbru.
