U CEM ka JHADC, u Thombor Shiwat hawa wan cha Mukroh ynnin ka sngi deilang wa ki dkhot ka Executive Committee da lai pait ki ya u pood ka chnong deiwa lai hadooh wa kut u pood chwa u sdang ka Assam wei hawa yaklam wa kiwa thoh khubor da dawa bait u naka sorkar Meghalaya wow booh bait yaka Police Border Outpost (BOP) na Zero Point iwa mut nadooh i bynta wa kut ka chnong Mukroh wei sdang ka jylla Assam.
Da ong u wa deiwa booh ya kani ka BOP ha u Zero Point daw pynyoo che ko hadooh heiwon em u pood ka Meghalaya.
Heiyatoh wa i pynbait pood, da ong u wa ka Elaka Labang Nangphyllut wa Pangam Raliang kawa da jooh em nachwa kawa da em leh ya u Dolloi deilang ki chnong Pnar wa em hapoh kani Elaka, toh u psiah biang ki chapoh ka Meghalaya.
Kam wow pynkynmoo wa kani ka Elaka toh kawa da wiar noh hadien wa ha u snem 1951 da pynmih hukum da u Governor wow em noh kini ki chnong hapoh ka Mikir Hills ym toh de hapoh ka United Khasi Jaintia Autonomous District Council heiwa ya kani ka Mikir Hills katni da tip kam ka Karbi Anglong.
Da leh ya ini heitu i por wa jan kini ki chnong cha Mikir Hills bar cha ka Jowai Sub-Division yow pynsuk yei synchar paidbah tangwa manda yoh jylla ka Meghalaya, kini ki chong ym em kynthup lang ki kam chibynta ka jylla Meghalaya.
Ki chnong kiwa da chah kyrriah ha itu i por ha u 1951 da em ki hadooh 36 tylli.
