Ka MLA yong ka Congress na East Shillong, ka Dr. Mazel Ampareen Lyngdoh da ong ko wa lada ki seiñ saiñpyrthai kiwa emlang katni ha ka sorkar synrop Meghalaya Democratic Alliance (MDA) ym hun ki ya kani ka sorkar, ileh wym mih noh wow sdang da kawi ka sorkar.
Da ong ko wa ka Congress kawa em katni ha ka liang pyrchah ym em ko yei thmu wow pynwit ya i pynlai yong kani ka sorkar, tangwa da yoo ya ki drama wa chyrkhei bha, heiwa waroh chi kattu ka BJP da wanrah wei ban ko wa ko ya ki kaam baam-tooh yong kani ka sorkar, wei manda rap thanda ka BJP, mih sa ka UDP katni wow dawa pynhiar chuki ya u Montri wa emlang ha ka sorkar.
Kawa yahkhmat ka Congress da ong ko wa ha kani ka sorkar waroh ya saitkti bait, wei i kylli wa mih wa lada ki seiñ kiwa emlang ha ka sorkar synrop ym hun ki wei kat ini i kynrum kynram da mih paidbah ki, ileh wym pyrkhat ki wow sdang noh da kawi ka sorkar, ileh wa yang ki ya ka Congress wow chah pynbaad wa ka toh kawa yaknieh chuki, deiwa pynrap leh lada katni ym em i yaknieh chuki.
Ka Ampareen da ong ko wa ka Congress da elaad ko ya ki ka sorkar kawa skem, tangwa para ki won ym em i skem wei da yoo ya i kynrum kynram na i por cha i por. Da ong ko wa i saitkti yong kani ka sorkar ym toh iwa yoosuk, deiwa pynrap chooh chooh wa lada ym em de i chaniah ha uwi u Montri ha ka sorkar synrop, ileh wym mih noh.
Ka MLA yong ka Congress da ong chooh chooh ko wa katwon u pynbaad ya ka sorkar wa da dep, heiwa da pynrap ko leh wa ha Congress ha i por wa ka chimkti ko ya ka sorkar, ka chim ko leh ya i bahkhlieh, khlem da pynbaad ko ya ki sorkar wa hachwa, wei katni leh ka Party da pynyoo ko ya ka nongmuna deiwa chong khop bait haka liang pyrchah.
