Ha i jia iñ yung wa yoo chyrkhei ha ka chnong Mawbah kawa haap hapoh ka Jhalupar Police Outpost, ar ngut ki khynnah khian ym pu chem ya ki hadien wa iwi i yung da kopdiñ i ynne i janmiet ha i por kamwa 7:00 waje.
Ini i iñ toh iwa da jia ha i yung wa soo mala wei kawa mantre da ka Ermon Nongkynrih, wei ka bynta wa kopdiñ toh ha ka mala kawa cha jrong dooh kawa da chna dei dieñ, wei ha katai ka mala da em san kynrad ki manyung kiwa sah wa da baam i diñ.
Katkam ka khubor wa da yoh da khana wa i kopdiñ ye wow man nei pdung u tadong LPG, tangwa ki pulit dang pynman ki yei takit hajrong itai i jia yow chem yei daw i kopdiñ, wei neiliang ki pulit tympleh diñ dang pynman ki yei thooh ya katai ka mala hadien wa da ye ki wow tympleh yei diñ kawa da poor smat bha.
Chooh chooh da khana wa ya katai ka thaw wa itai i yung toh kawa rap em cha kdong bha iwa da pynman ya ki kari tympleh diñ wow chimpor wow poi hadooh katai ka thaw ha i por wa biang.
