15 49.0138 8.38624 1 0 4000 1 https://wyrta.com 300 0

INAMORATO, ka Film kawa klam hajrong u budloom yong ka imlang sahlang: Terence Sawian

0 Comments
Advertisement ad1

Hadien wa da yoh O u pait ya ka Film INAMORATO wa pynmih da u Jimmy R. Kharmuti nga chem O wa kani ka Film man ko kawa yoosuk bha hadooh kattæ kattæ kawa em yurim wei ka parom ko leh man ko katkam wa man ha ka imlang sahlang ki paaid ka ri-loom Khasi Jaiñtia.

Ha kani ka Film da klam chaphang ki kynthai wa i kyrdan wa kyrpang tam ha ka dustur riti ka Bri u Ynñiawtrep Ynñiawskum wa pynkup ha ki kiwa kit ya ka bukrom ka jaitbru.

Ka Film da klam ko chaphang ki le tylli ki daw wa pynjæd pynpra ya i chongkurim kitæ toh ka spah ka phaw, ka niam ka rukom wei wym kheiñ kordor yei maya ha ka chongkha chongman wei ini da wanrah ko yei hiar dor i manbru longbru kamjooh leh i hiar kyrdan yong ka jait bru hi waroh kawi.

Ha kani ka Film INAMORATO kawa e pyrtuid hei ktien Latin iwa mut leh I Bor I Maya, i sneiñ wa e ko toh wow warah biang ya ka INAMORATO ha i rukom im ki bru wa da jæd da pra yow pynkylla dur noh da i bor INAMORATO.

Yow sñiawthooh bha ya i yumut ka INAMORATO nga da pynchlur wei da kyrpaad O ya waroh ki paidbah para kur wa ki paralok wow lai pait khnang ya kani ka Film wei nga ngait skem wa daw yoh myntoi ki chiboon lyngba kani ka Film heiwow saiñdur ya ka mynried ka mankawi ka manyung mansem waka jaitbru.

Nga da yaroh O khamtam ya u Director kani ka Film u Jimmy R Kharmuti uwa da chimkhia wow pynwan dur wow pynmih ya kani ka Film wei hei chem yong nga man u u bru wa jemnood wei uwa yaar i pyrkhat pyrdaiñ wei iwa ktah dooh ya nga toh wa kwah u kyntu ya kiwa em sap ha ki kaam Film nadooh kiwa ak hadooh kiwa riñ dur, kiwa rwai, kiwa chaad wa kiwi kiwi.

Kamtæ nga da kitbok kitrwiang O ya oo wow yoh u i kyrkhu wa i jop ha ki sngi wow wan.

Khaddooh kani ka film INAMORATO man ko kawa yatoh bha wow  pynyoo ha ki skur wa ki College wa ha waroh ki thaw neidaw wa kani ka Film yarap ko leh ya ki khynroo khylood wow pyrkhat ki chaphang ka mynried yong ki.

U Terence Sawian toh u tre ka Winner Mind Foundation kamjooh uwa sikai ha St. Mary Mazzrello HS School, Jowai.

(Left) Terence Sawain, (Right) Jimmy R Kharmuti

 

Advertisement ad1

0 Comments

Leave a Reply