Heiyatoh wa i pynbait pood wa da pynman ha ka 15 tarik uni u bnai ha Umkiang hapyrdi ka sorkar Meghalaya wa Assam, neiliang ka KSU Narpuh Circle da ong ko ini da yoo phylla wa wot hadooh kiwa thoh khubor ka jylla Meghalaya leh ym tip ki katwa ka sorkar Assam won da wanrah ko chiboon bha kiwa thoh khubor wot nadooh na Guwahati.
Neiliang u K. Suchiang uwa man kam u General Secretary ka seiñ da ong u wa ini da yoo sarom wei ymtip de iyi wa em cha kylla namo i thmu ka sorkar Meghalaya neibhah ki yong ka Assam mar ya hiar kari u Montri yong ka da yoo chngaaiñ wei yoo chongkhia kiwa bood ya oo katwa ya u Symbood Montri Rangbah ka Meghlaya, u Sniawbhalang Dhar won lyngam kiaw wei ini da pyndooh burom ko ya u Sniawbhalang uwa man leh u khlieh ka Regional Committee wei kamjooh ya ka MLA ka thaaiñ ka Santa Mary Shylla MLA wa yaka jylla hi waroh kawi.
“Kammon u chaniah ki du ha kiwa thoh khubor kiwa na Assam kat yei kaam pynbait pood wei kammon u pyrkhat ki Assam wa wot kiwa thoh khubor ka jylla Meghalaya leh ym bien ki wow ya krehlang,” da ong u K. Suchiang.
Da kylli u leh wa ileh murieh ka sorkar khlem pyntip cha kiwa thoh khubor wa daw pynman ya kani ka yalang katwa kiwa thoh khubor ka Assam da biang wa pyntip cha ki la kam wym emkaam kani ka yalang pynbait pood namo kawa leh tangdep.
Chooh chooh da ong u wa da yaklam leh ha katai ka sngi hajrong ki kaam wa yatoh waka wah Malidor kawa pynyakhlaad ya ka Assam wa Meghalaya, heiwa da yaklam wa kani ka wah u man u kam u pood wa da booh da ka bei rym-aw iwa waroh ar jylla u embynta ki wow pynneh pynsah wei wow ri sumaar yeiwa emkaam ka rym-aw wa ki dohum wa waroh kiwa emkaam ya ka neibhah ka chnong Ratacherra leh kwah ko ya ini. Neibhah lada pait ya itu iwa pynbait pood wot haka wat wa nyngkong namo ka Phase-I, ka wah Malidor daw haap ko chapoh Assam deiwa ka sorkar Assam da kular ko wow pynneh pynsah yeiwa em ha kani ka wah wei ym chah leh ya ki nong Assam wa Meghalaya wow khloh moo.
Tangwa katkam wa da tip wa i yaklam ha katai ka yalang waroh ki ar liang da mantre ki ya katai ka wah, wei ya waroh ini i yaklam daw rah cha ka miej yong jar jiar ki Montri Rangbah yow chim yei rai.
Puræ leh: Yachem ka sorkar Assam wa Meghalaya ha Umkiang yow yaklam pynbait pood
Discussion about this post