Hadien wa chah hiar thma deiwa chah siat yap ki 26 ngut ha Pahalgam ha ka 22 tarik u Naitung (Apr), ki chipai ka ri leh da pynkhreh ki wow tput yeini iwa jia yeiwa da leh da ki Terrorist wa kyrchaan ka Pakistan.
Ha i step synyaaw ka 7 tarik uni u bnai ki chipai ka Indian Army da siat Bomb ki cha ki thaw ha Pakistan wei ini i dat Bomb da pyrtuid OPERATION SINDOOR wei du hadien wa sdang ini i tput da pynmih wot leh ya ka chap namo ka Logo yong kani ka Operation.
Ya kani ka chap da pynwandur da u Lieutenant Colonel Harsh Gupta wa u Havaldar Surinder Singh yong ka Indian Army.
Ya ki dak ha ka chap da thoh da ki dak heh wei uwi u dak ‘O’ ha i kyntien SINDOOR da pynwandur ha i dur i khieh wa em i sindur (rong soo).
I sindur wa jooh thoh ha khlieh toh i dak wa em kurim katkam i ngait niam Hindu wei ha ka chap chi bhah i sindur toh iwa brait charood wei ini mut i dak wa da yap u kurim ki kynthai ha i jia ha Pahalgam.
Ya i pyrtuid Operation Sindoor da pdiang da u Prime Minister ka ri, u Narendra Modi wei katkam i ong ki heh sorkar ini pynyoo i yei sñiawsih wei chrai hadien iwa jia ha Pahalgam heiwa boon ngut ki kynthai da yap kurim ki.
Ha ka Operation Sindoor da dat Bomb ya 9 tylli ki ktem ki damok kieñ suloi namo ki Terrorist ha Pakistan wa ha Pakistan-occupied Kashmir heiwa da yap hadooh 100 ngut ki Terrorist.
Ka Operation da pynpra ko phrai ya ki ktem ka Jaish-e-Mohammed, Lashkar-e-Taiba wa ka Hizbul Mujahideen.
Discussion about this post