Jai jai ka lai paidbah ki khynnah puræ ynne ka sngi

Jowai : Ka lai paidbah ki khynnah wa dooh u psiah ha ka Kiang Nangbah Government College chirup wa ki khynnah puræ kani ka College hapoh ka KGNCSU, ki manbei manpa wada kyrchaan leh da ki dkhot ka NEHU Students’ Union da pynman ki ya ka lai paidbah wa jai jai ynne ka sngi.

Kani ka lai paidbah da pynman hadien wa chah kyntait ki spah ngut ha kani ka thaw puræ wa kamjooh leh wow dawa na ka sorkar wow thooh ya ki laad wow pdiang ya ki kamjooh leh wow pynboon ya kiwa sikai ha kani ka thaw puræ.

Ya kani ka lai paidbah da sdang nadooh na ka College wei da lai hadooh ha phrang ka yung krehkaam u DC ka West Jaiñtia Hills heiwa da yieñ ki chibet chipor heini.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Du hadien kattu katni por u ma D.P. Kharsati (MCS) chirup wa u DSP u ma C. Syrti da yaklam ki wa kiwa yahkhmat ya kani ka lai paidbah heiwa da khut yaklam ya ki wa u DC.

Kiwa yahkhmat da lai yachem ki wa u DC katwa kiwa boon won ki khynnah da lai ki cha madan Jrisaleiñ yow yang ya kini kiwa yahkhmat ya ki.

Hei yachem wa u DC kiwa yahkhmat da pynsñiaw ki yei eh i khoo wa yachem ki khamtam ki khynnah wa chah kyntait ha ka College wei da pynsñiaw leh yei emkaam u pynboon ya kiwa sikai ha kani ka thaw puræ.

Neiliang u DC da pyntip u cha ki wa neiliang yong oo da pyntip (report) u cha ka sorkar wei hadooh katni ympu em u yoh jubab u na ka. Da ong u leh wa neiliang ka sorkar da thooh ko ya ki yung wai yow pynman class tangwa ka yung wa yoh ki khian bha ko katwa kamtæ da haap pyndam ya ka.

Kiwa yahkhmat da pachat yumut ki leh ha u DC wa ka sorkar hadien wa yoo ko yeini wa boon ki khynnah kat dang mih ki snem da toh u sdang noh ko sa ka evening shift.

Neiliang u DC da pyntip u leh wa ki heh ka tnat Education daw chong pyrkhat ko yeini wei daw tip ya ka rai yong ka sorkar du ha kani ka 24 tarik uni u bnai heiwa da phah wan biang u ki ha kani ka sngi.

Heijooh i por kini kiwa yahkhmat da kyntu ki ya u DC wow pyrchang yaklam wa kiwi ki thaw puræ wa em ha sor Jowai boi ye ki u pdiang ya kini ki khynnah kiwa chah kyntait yow lait u man kamwa chah iehbeiñ hi-eh ki.

Hadien ini i yachem kini kiwa yahkhmat da lai ki cha madan Jrisleiñ heiwa da em da ki spah ngut kiwa yang ya ka rai na ka sorkar wa na u DC.

Ynne ka sngi da em leh ki manbei manpa yong ki khynnah wa chah kyntait heiwa boon na ki da pyntip ki wa ym ye ki u phah ya ki khon ki cha kiwi ki thaw puræ neidaw wa syad ware ki.