Ynnin ka sngi u Deputy Commissioner ka West Jaiñtia Hills, da pynmih u ya ka hukum wow khang lut ya waroh ki yaw kiwa em ha Jowai kam ka laad wow pynduna yei poor ka khlam kjut COVID-19 hapoh ka District.
Ynne ka sngi hawa lai sakhi ya ki yaw ki haat kiwa em ha Jowai kiwa kynthup nadooh Iawthymme, Iawmusiang wa kiwi kiwi da man ki kiwa langam dait-thah.
Da yoh leh u yaklam wa ki kattu katni ngut ki manbei kiwa jooh chong-dai ha Iawmusiang heiwa da pynsñiaw ki yei mynsien wa khia hajrong ini i khang syndet ya ki yaw.
Hawa yaklam wa kawi na kiwa jooh chongdai, ka Riang Shylla da ong ko wa kam kiwa chong-dai da chem chitom bha ki neibhah wa khih ki myntu yow baam ki myntu hi wei ha jar jiar ki sngi u thied ki ya ki marbaam ha yung man-ka-sngi.
Da kyntu ko ya ki bor chnong wa ki bor sorkar wow pynlait ya ki neibhah wa ki ym em kiwa kreh sorkar ha yung yong ki wei im ki deiwa mylla bait wei da im-ja bait ki neini.
Chooh chooh da ong ko wa dap ko dei sñiawsih wow liwan thylli cha yung khlem yoh u thied baam ya ki ksu wa ki khon ki kti yong ki neibhah wa da khang ma khang ya ki yaw kamni.
Kawi won kawa jooh chongdai, ka Renew Slong da ong ko wa mar pynbna wow khang ya ki yaw da dap ki khmat wei ki syngkhien leh da jhieh hei step neidaw ki umkhmat wei hap pyndap ki yeiwa emkaam ha yung waroh wei manda kjut ki khon da hap paan na ki malik.
Da ong ko wa da hun ki wow chah klam katwa em nadooh wow chah kut wa tyngkheiñ aiñ næ kiwa pyrchah aiñ neibhah ym yohsa de ki nei wym emlaad de ki.
Ka kong Renew da ong ko wa ynnin da yaleh ko wow thiah khlem baam ja wow yoh tang ki khon, tangwa chi-miet chi-yaw yachoh ki wieh ha kpoh tæ ym yohsa khai tæ baam ko.
Kiwa chongdai da kyrpaad ki ya ka sorkar wow yarap wei wow kyrchaan ki ya ki kam ha ini i por.
