theme-sticky-logo-alt
theme-logo-alt
Advertisement ad1

Hadien i lai paidbah, kular u DC wow phah khang noh ya ki karkhana pyrchah aiñ hapoh Elaka Sutnga

Ki paaid ka Elaka Sutnga, East Jaiñtia Hills District hapoh i pynlai ka Environment Co-Ordination Committee (ECC) lyngba u Chairman yong ka u D.H. Malang wa kiwi ki dkhot ynne ka sngi da mih paidbah ki kam ka dak wow pyrchah ya ki Karkhana Coke hapoh ka Elaka kiwa da mih boon tylli bha. 

Ya ini i lai paidbah da sdang na 1 Kilo wei da lai cha pchem ka yung krehkaam u Deputy Commissioner ka East Jaiñtia Hills District, Khliehriat, ryngkat ki Placard wa i kbai wow beiñ joor ya ka sorkar MDA hapoh i yahkhmat u montri rangbah ka jylla, u Conrad Sangma wa kiwi ki montri ka sorkar wa ya kitu kiwa da pynchah pyrtuid ya kini ki kharkhana.

Ha ki Placard namo ki kot rben da thoh ya ki kyntien wa ong wa kini ki karkhana rap maa ki bar ya ka khlam COVID-19 wei ymtoh wow elaad wa ka mynried u dap ko dei tdem wei da emkaam ya ka la’ær wa khooid wow riñ mynsien. 

Manda poi ha pchem ka yung krehkaam u DC, neiliang kiwa kitkaam kani ka ECC da yachem ki ya u DC, u E. Kharmalki, hei emlang u MLA ka Sutnga Saipung, u Shitlang Pale heiwa u DC da kular u leh wa nadooh mynstep daw leh u yeiwa emkaam wow phah khang ya waroh ki karkhana wa da chna pyrchah ya ka aiñ. 

Neiliang ki paidbah hawa e yei klam hajrong ini pyrchah yong ki da ong ki wa ymtoh du i mih tooh kini ki karkhana tangwa i mih kini ki karkhana kam ki tit iwa daw ktah i ya i chait i khiah ki paaidbah ka Elaka ha ki rukom wa boon jait deiwa beiñ leh ya u Dolloi wa pait ya ka Elaka wa da leh embor u khlem ap de ya i sur ki paidbah heiwa ym em wot tang u pyntip cha ki chnong kiwa haap hapoh ka Elaka.

U R.K. Sutnga da ong u wa hapoh ka Elaka em boon ki karkhana Coke wei ym duna ki ya 35 tylli wei napyrdi kini boon toh kiwa man pyrchah aiñ neibhah wa da dang yohbor ki du na ka Single Window Agency ka sorkar jylla wei ki won da sdang chna wot ki. 

Ki thaw wa boon dooh i chna ya kini ki karkhana toh ha 4 kilo, ha Umpleng, ha Nongjri, Umthe wa kiwi kiwi.   

Da beiñ leh ya ka Meghalaya State Pollution Board (MSPCB), heiwa da khang wei da thaw tdem ko du ya ki kari tangwa ki karkahana Coke won ym em wa bna ya ki. Da ong u leh wa kawi ka Kharkhana Coke pynmih tdem ko iwa yaryngkat hadooh 2-3 hajar tylli ki kari wei lada kheiñ waroh ki karkhana wa yohbor na ka Single Window u yieñ krehkaam lut ki, kattæ ym man de ya ki wow chong chnong heiwa daw hap yut noh ki chawi. 

Chooh chooh da ong wa kini ki tre hun ki wow dai ya ka jaitbru du wow yoh ya ka 5% wa 10% deiwa pynchah pyrtuid donhi katwa ki tre won toh ki dkhar heiwa da kyrpaad ya ki tre karkhana deiwa ong wa hanla em thaw sah ki chawi emkaam leh wow wyrai wei wow pyrkhat ya ka mynried ki khynnah, wa ki ym em thaw de ki chawi wow yut.

Heijooh i por da ong wa katni wot ki khynnah leh tip wei sñiawthooh ki yei sma-tung ka la’ær heiwa da ngooh Blai ki wow lait na i roi kini ki karkhana. 

U R.K. Sutnga da pynkut u ya i klam deiwa ong, u Blai dei langær maap u, wei u bru leh em ki por wow maap u, katwa ka mariang won ym maap ko, neibhah lada pynjakhlia ya ka daw wanrah ko ya ki kjut wa ha rukom. 

Share this:
Previous

Jhieh ki syngkhien hei step na ki umkhmat wa phah khang yaw, ong kiwa chongdai ha Jowai

Next

Da sdang ya ka Joint Committee wow kyrriah ya i thaw noh-jhep na Marten chawi tawon