Jowai: Ka Dorbar Chnong Sonapyrdi, East Jaiñtia Hills District ha kani ka chi tarik uni u bnai da yoh ko wow jied thymme ya ki wa yahkhmat ka chnong neibynta u snem 2018-2020 ha ka yalang paidbah kawa pynlai da u Ning Mynthoi kam u Chairman ha yungskur Government L.P School Sonapyrdi hei emlang u Dolloi ka Elaka Narpuh.
Ha ka jied paidbah kiwa chong chnong yong ka chnong Sonapyrdi, da jied ki ya u Edimon Lamare kam u Waheh Chnong wa thymme ka chnong Sonapyrdi, da jied General Secretary da u Daiapherbha Lamare wei da jied Chairman da u Ning Mynthoi uwa man leh u Chairman warim yong ka chnong deiwa yieñlang wei rah kti waroh kiwa wan Dorbar ha kani ka sngi.
Da jied leh ya u Assistant Waheh Chnong da u H.S. Pyrtuh, Assistant General Secreatry da u Tackmon L Gympad, Finance Secretary da u Condrick Lamare, Treasurer da u Obed Laloo, Auditors da u Thikkhih Gympad wa u Kutlang Gympad wei da jied leh hadooh 12 ngut ki dkhot ka Executive Committee wa kynthup ya arngut ki manbei.
Ya kini kiwa yahkhmat chnong wa thymme yong ka chnong Sonapyrdi da pynskem ya ki da u Manbha Kyndoh uwa man kam u Dolloi ka Elaka Narpuh uwa da klam e mynsien ya ki wow kreh hok ya ka kaam khnang yow em ka bha ka miat hapoh ka chnong.
Da yoh leh ya i klam na u Waheh Chnong wa thymme wa u General Secretary wa thymme kiwa da pynsñiaw yei sñiawngooh ya ki paaid yong ka dorbar chnong kiwa da jied ya ki wow kynrong ya ki kaam chnong wei wow pynbha pynmiat ya ka chnong ka thaw ha waroh ki liang.
Discussion about this post