Ka Dorbar Chnong Nartiang Pyllun da pyndep ko yei jied Waheh Chnong thymme ha ka 24 tarik uni u bnai wei da man ko kawa kawa lai bait lai ryntih heiwa u Mom Phalangki da chah jied biang u kam u Waheh Chnong neibynta ki 3 snem.
Ha kani ka sngi ya jied waheh chnong da man ko kawa chongchit bha neidaw wa ki paidbah wa chong chnong da pynyoo sakhiat ki yei kitkhlieh neibynta i roi i paar i chongsuk chongsaaiñ, deiwa ya mih paidbah ki nadooh ki khynroo, ki khyllood wa ki waheh wasian wa ki tymmen.
Ya kani ka Election jied Waheh Chnong da pynlai ya ka da ka yung krehkaaam ka Administrative Officer JHADC, Jowai ryngkat wa u Kloi Pale, Acting Dolloi ka Elaka Nartiang.
Ha kani ka sngi da em le ngut ki kyrtong kiwa yakhun kitæ u Mom Phalangki, u Ridon Phalangki wa u Chalbestar Myria.
