Ka Dorbar Chnong Mukhla Nongrim da jied thymme ko ya u Waheh Chnong yong ka ha ka 9 tarik uni u bnai deiwa pynman ya ka thap Vote ha Community Hall yong ka chnong.
Ka Dorbar Chnong da pynman ko ya ka Election jied Waheh Chnong thymme hadien wa da kut ka samoi krehkaam u Waheh Chnong warim heiwa ha kani ka kynti da em arngut kiwa da yaleh wow man Waheh Chnong.
Ya kani ka Election jied Waheh Chnong da pynlai da u R. Moon Garod, Dolloi ka Elaka Nangbah heiwa ka chnong Mukhla Nongrim dang haap ko hapoh ka Elaka Nangbah.
Ki kyrtong wa da yaleh Waheh Chnong toh u Buhlut Suna wa u Mista Suna heiwa hadien wa niaw ya ki Vote, kiwa chong chnong da jied ki ya u Buhlut Suna wow man kam u Waheh Chnong wa thymme ka chnong Mukhla Nongrim neibynta ka samoi krehkaam wa 3 snem nadooh ynne ka sngi wa da pynbna da u Dolloi.
