Shillong: Uwa yahkhmat ka BJP uwa man leh u MLA na South Shillong, u Sanbor Shullai da kyntu u ya ki paidbah ka Shella wow khyrngiat yong bru ki yow jied bait ya ka BJP kawa em ha ka sorkar ha Delhi khnang wow myntoi ki neibhah daw wan bait sak nadooh Delhi chadooh Shella khlem ya iwa emkaam ki yow lait u lai kyllaiñ.
Hawa klam ynne ka sngi cha ki laad pathai khubor, u Sanbor uwa wan wow synran ya u kyrtong ka BJP wow yakhun na Shella, u Joshua Warjri da ong u wa ki montri sorkar, nadooh u montri rangbah, kiwa yahkhmat ki District Council ki da rah dorkhat ki wow paan poisa na ka sorkar BJP na Delhi, deiwa ong e poisa e poisa, wei bha ko ya kiwa chong chnong ka Shella wow jied bait ya ka BJP ka wow wanrah bait sak ya ka poisa bar yow lai cha ka Team B, Team C.
Hajrong i kynthah ka Congress, u Sanbor da ong u wa ka Congress ka joor ko du wow kynthah bru wei na ini i daw wa ki bru da kyntait lut ki ya ka ha waroh kawi ka ri. Da ong u wa ka Congress ka da synchaar ko da boon phaw snem ha ka ri wa ha ka jylla, wei i leh dang sahdien ka jylla hadooh kini ki sngi wei da kylli u leh wa hawa ki paidbah ki e laad ki ya ka Congress wow synchaar, tangwa i leh won wa ki luti syngkieñ dang sih ki hadooh katni. Da ong u wa ka Congress ka da tlot ko wei da kynthah ko yaka ka BJP kawa khlan wow kreh bait da i kaam.
Hajrong ka Citizenship Amendment Bill (CAB), u Sanbor da ong u wa ka BJP ka da dep pynsñiaw ko wa ka sorkar pyrdi ka ye ko wow pynkrehkaam ya ka tangwa ha ka thaaiñ mihsngi e laad ko ya ki paidbah wow pdiang ki namo ym pdiang ki.
Da ong u leh wa ini ym toh du i klam wei daw leh u leh da i kaam deiwa booh yaka jaitbru hakhmat katwa kiwi ki seiñ ki kular ki da i bneiñ heipor Election tangwa manda jop e ki da i dujok.
Discussion about this post