Shillong: U Mosjo Rockfeller Wanswett uwa thap pyrtuid ynne ka sngi ha u SDO (Civil) Sohra u L. Kynjing kam u kyrtong ka People Democratic Front (PDF), wei da synraan lang kiwa yahkhmat ka Party nadooh ki MLA wa kynthup ya i Banteidor Lyngdoh, u Hamletson Dohling, u Gavin M Mylliem wa kiwi dei kiwa yahkhmat ka Party.
Hawa yaklam wa ki laad pathai khubor, u Mosjo da phla wa hanlada u payu yong oo u Leston Wanswett dang em u haka NPP tangwa oo won da jied u wow yakhun na ka PDF neidaw waka man ko ka Party kawa dang khlan wei kawa dang heh.
Da ong u wa man ko kawa sñiawsih wa u Lestone da em u ha ka juk tymmen, ym ye de u wow bood lang wa oo wei na ini i daw, da hap u wow chaniah ha kiwa yahkhmat ka Party wow yakreh ha kani ka Election.
U Mosjo da ong wa em kyrmen neidaw wa u payu u, u Leston Wanswett da yakhun la 3 sien wei wan wa ar u. Da pyntip u leh wa neidaw wa u Leston rap noh rta u, ym ye de u wow yaleh ya ka Election wei da khut u ya oo kam u diah wow yakhun ya ka Election wow pyndep ya ki angnood yong oo wow chakri ya u paidbah ka Constituency.
Da ong u wa u Dr. Donkupar Roy wa da khlaad hadien wa da jop u ynñiaw sien, da yoh u wow kreh tangwa dang em kiwa sahteiñ wa ym pu em wow pyndep. Wei da pynrap u wa lada jop, kiyi kiyi kiwa da leh u MLA nachwa daw booddien wei wow wanrah leh ya kiwa thymme.
Discussion about this post