15 49.0138 8.38624 1 0 4000 1 https://wyrta.com 300 0
Advertisement ad1

Joor i yaklam ynne hapoh ka yung dorbar neibynta ki Scheme saam umdih

0 Comments

Shillong: U MLA ka Mawphlang u Syntar Klas Sunn da ong u wa em chiboon ki Scheme wa ki tnat sorkar da pynkrehkaam ko kam ka Greater Shillong Water Supply Scheme kawa da lai cha khmat katni tangwa em i eh heiwa ka PWD da man ko kam u moochynthut ya ka PHE wow krehkaam ko.

Hawa wanrah ya kani ka pang ha yung dorbar ynne ka sngi, u Syntar da ong u wa ka tnat PHE da pynkrehkaam ko ya ki Scheme saam um cha ki thaw sor wa cha ki thaw nongkyndong tangwa boon kini ki Scheme ym ye u pyndep neidaw wa ka tnat PWD ym bien ko u krehlang.

Advertisement ad1

Da kyntu u Sunn ya ka sorkar wow chimkhia wow thooh ki laad ki luti wow pynwiar ya ini yow ye u pynkrehkaam yei dooh um ha waroh ki thaw yow ye u pynkrehkaam hok ya ki Scheme ha waro ka jylla.

Ha iwi i liang, u MLA ka Mawsynram u Himalaya M Shangpliang da ong u wa ki bru kiwa sah cha khappood ka Bangladesh ha ka Constituency yong oo ym tip ki tang ya ki Pipe um namo ya ka PHE wa ye u yoh um na ki nan wa ki wah.

Da ong u wa u Officer ka PHE na Mawsynram da phah u ya ka tyrwa wow chna ya ka Scheme saam um baam kawa da poi hadooh T.20 Klur tangwa sñiawsih wa ka sorkar ym em leh ko iyi iyi leh heiyatoh wa ini kamjooh leh wa kiwi ki Scheme leh. Da kyntu u ya ka sorkar wow pyrkhat lang wow yei tyrwa wow pynpsiah ya kani ka Scheme ha ka thaiñ Mawsynram ha kani ka kynti.

Katwa u Charles Pyngrope u MLA ka Nongthymmai da ong u wa i wanrah ya ka Scheme saam um ha Nongrah ha u snem wa da dep toh iwa khih khohreh khlem da lai katkam ka kyndon wa toh u leh katni wei da booh ko yei eh i khoo neibhah i saam um napoh khyndaw khlem em i pyrkhat bha ya ka deiwa biang.

Da ong u leh wa da em ka laad wow taan um na ka thaiñ Mawlynngad kawa haap ha ka Constituency yong oo wei ka tnat PHE toh u leh ko wow pynbiang um dih ko ha ka Constituency yong oo kiwa boon ki thaw toh kiwa dooh um.

Kamjooh u MLA ka North Tura u Thomas A Sangma da kyntu u ya ka sorkar wow thooh laad wow pynbiang ya ka um ha ka sor Tura kawa boon kiwa chong chnong chem chitom ki.

Advertisement ad1

0 Comments

Leave a Reply