Jowai: Ynne ka sngi da pynman ya ka yakhun Final ka Super Division ka WJDSA kawa tip leh kam ka Kiang Nangbah Memorial Trophy hapyrdi ka 7 Wasa United waka Sabah Muswang.
Ka 7 Wasa da jop ko da 3-0 da ki kool wa thap waroh ha ka kylla miet.
Ka kool wa nyngkong ka 7 Wasa da thap da u Pynshai Lathong ha ka minit wa 47 wei da neh ko hadooh chwa u kut tangwa hadien wa e sa 3 minit kam ka Injury Time, da lai ar tylli ki kool hapoh 2 minit kawa thap u Nipongi Sumer ha ka minit wa 90+1 wa u Felixson Bang ha ka minit wa 90+2.
Ya kani ka yakhun Final da wan sakhi da u montri ka chnat Sports & Youth Affairs u Banteidor Lyngdoh, u MLA ka Jowai Constituency u Wailadmiki Shylla ,u DC ka WJH u Garod LSN Dykes wa ki DSO na WJH wa EJH.
Ha kani ka sngi saam leh yei naam Top Scorer cha u Simion Suchiang, Player of the Match cha u Pynshai Lathong wa i naam Player of the Tournament cha u James Gray Tongper waroh kiwa na ka 7 Wasa.
Kiwa jop deilang waka Trophy da yoh ki leh ya ka song poisa wa T. 30,000 katwa kiwa rem da yoh ki T. 20,000 deilang waka Trophy.
Neiliang ka WJDSA da chim ko leh ka laad wow pynkup burom ya ki le ngut kiwa da wanrah burom ya ka ri-loom Jaiñtia.
Da pynkup burom ya u Marso Kyndait uwa na ka chnong Sabah Muswang uwa yoh takma ksiar ha ka 1500M Race ha ka 1st North East Olympic Games wa pynman ha Imphal, Manipur nadooh ka 24 hadooh 28 tarik u Naichiphaw, 2018
U Armanki Bareh uwa na Dulong, Jowai uwa yoh takma tama ha ka 4x400M Relay Race ha ka 1st North East Olympic Games wa pynman ha Imphal, Manipur nadooh ka 24 hadooh 28 tarik u Naichiphaw, 2018.
Wa ya ka Riiohlang Dhar kawa da yoh yei naam FIFA Assistant Referee waka AFC Elite Assistant Referee.
Discussion about this post