July 19, 2019

Jop ka Chilliang Raij ha ka Independence Day Cup Under-16

Jowai: Ka Independence Day Cup Under-16 Football Tournament wa pynman da ka WJDSA, ynne da poi ko cha ka sngi wa soo wei da pynman ar tylli ki yalehke.

Ha ka yalehke wa nyngkong, ka Chilliang Raij da pynrem ko yaka Mynso Blazon da 1-0.

Ya ka kool da thap da u Hamewan Rngad ha ka minit wa 53.

Ha ka yalehke wa bood hapyrdi ka Khliehiongriang wa Khimusniang da kut 1-1.

Ya ka Khliehiongriang da thap kool da u Savio Tariang haka minit wa 12 katwa ya ka Khimusniang da thap da u Balajied Sympli ha ka minit wa 28.

Mynstep ka 20 tarik daw pynman 4 tylli ki yalehke heiwa ka Dongmihsngi daw yachem ko waka Ladthadlaboh heipor 11:00 waje i step, ka Mukhla Raij daw yachem ko waka 7 Wasa heipor 12:30 pyrdi sngi, ka Demthring daw yachem ko waka Pynthorlangtein YW heipor 2:00 i sngi, ka Wahiajer u yachem ko waka Mookymphad heipor 3:30 i sngi.