Ka Election cha ka Lai Autonomous District Council (LADC), Aizawl kawa da niaw Vote ynnin ka sngi da jop biang da kawa em chwa hei synchaar katæ ka Mizo National Front (MNF) kawa da jop 20 na 25 tylli ki Seat.
Ka Bharatiya Janata Party (BJP) da yaleh ko na ki 17 tylli ki Seat katwa ka Congress da yaleh ko na ki 14 tylli heiwa da jop ki mar ka wi ka Seat ha Lawngtlai District. Na ki 3 ngut ki kyrtong samen kiwa jop uwi toh uwa kyrchaan da ka Congress.
Waroh da em kamwa 72 ngut ki kyrtong wa kynthup ya 16 ngut ki kyrtong samen cha ka LADC Election wa da pynman haka 4 tarik uni u bnai.
Na ki 22 ngut kiwa dang man kam ki dkhot ka LADC du 10 ngut da jop biang ki wa kynthup ya u Chief Executive Member (CEM) u T Zakunga naka BJP wa u Council Chairman u V Zirsanga uwa naka MNF.
Da em 12 ngut kiwa dang jop thymme wa 3 ngut kiwa da dep rem kiwa da jop biang.
Haka Election LADC wa pynman ha u 2015, ka Congress da yoh ko boon dooh deiwa em 16 ngut kiwa jop, pynbood saka MNF kawa jop 8 tylli ki Seat wa uwi u kyrtong samen. Chwa wow sdang ka Election wa katni, ka MNF em ko boon ngut dooh ki dkhot deiwa em 11 ngut, pynbood saka BJP kawa em 9 ngut waka Congress 5 ngut. Ki dkhot ka LADC da kylla ki boon sien ha ki 5 snem neidaw wa kynthiar seiñ ki dkhot boon sien.
Ya ka LADC da chna hapoh ka Sixth Schedule ka Constitution ha u 1972 wei da em ko 25 ngut ki dkhot wa jied da ki paidbah wa 2 ngut won toh kiwa deiwa thung.
Ka Council Headquarter toh kawa em ha Lawngtlai ha ki thaaiñ wa khappood ka Mizoram wa Myanmar.
Da em le tylli ki ADC neibynta ki jaitbru Lai, Chakma wa Mara kiwa da chna ha u snem 1972.
