Khliehriat: Ka Dong East Colony FC wa ka Dong Khadlynraw toh ki artylli ki dhab wa jop ha ka lympung yalehke kawa tip kam “Umlyngsha Football League 2018” kawa pynman da ka Umlyngsha Youth Society And Sports Club (UYSSC), Khliehriat, East Jaiñtia Hills ha Umlyngsha Football Playground ha kani ka 11 tarik uni bnai.
Ha ka yakhun wa nyngkong da pynman ko heipor 2:00 waje nohchariñ ka sngi heiwa ka Dong East da jop ko ya ka Dong Loom Pyrdi FC da 3-1 heiwa ka kool wa nongkong da yoh u thap chwa lyngba u Yowan Amkhlo yong ka Dong Loom Pyrdi ha ka minit wa 15 heiwa ka kylla step da kut ko 1-0.
Hawa sdang ka kylla miet, ka Dong East FC da pyrchang ko u yakhun joor yow yoh u su kylliang hawa ha ka minit wa 48 da yoh ko u thap lyngba u Thmubha Rymbai uwa da thap ar kool wei sa kawi won toh ka Own Goal.
Ha ka yakhun wa ar won, ka Dong Khadlynraw FC da jop ko da 3-2 pyrchah ya ka Dong MR RBBJ FC heiwa ka yalehke da man ko kawa yoasuk bha heiwa pyn artylli kini dhab da yakhun ki wow jop kawi ya kawi heiwa ka Dong KFC da yoh chwa ko wow thap kool lyngba u Armi Rupsi ha minit wa 18 tangwa ka Dong MR FC da yoh ko u su kylliang du hadien 6 minit lyngba ka Penalty hawa ka yalehke nang man chooh chooh ko kawa yathaiñ bha.
Ha chwa wow wai ka kylla step ka Dong Khadlynraw FC da yoh biang ko u thap pyntam sa chi kool lyngba u Armi Rupsi ha ka minit wa 29.
Hawa sdang ka kylla miet, ka Dong MR da pyrchang ko u yalehke bha deiwa pyrchang wow pynkhih jar na kawi i por cha iwi heiwa du hadien kattu katni por da yoh ko u thap kool ha ka minit 48 lyngba u Coming Rymbai kamtæ ka yakhun da pteiñ cha ka Extra Time heiwa ka Dong KFC da yoh syndet ko u thap pyntam chikool lyngba ka chut Corner kawa thap da u Batshkem Amkhloo.
Kani toh katkam ka khubor kawa pyllait lyngba u Namphrangmi L Talang, Secretary UYSSC, East Jaiñtia Hills.
Discussion about this post