Ka Shillong Lajong da yoh ko yei jop wa le deiwa hap u kreh chitom yow jop da ka kool wa thap bakla (Own Goal) da u Thomas Singh chwa wow kut ka yalehke yow yoh 3 Point khlem da rem kattu la le sien haka I-League ha ki yalehke wa da pynman ha Shillong.
Ha ka kylla step da khlanbor ka Lajong tangwa ka TRAU da thap nyngkong ko lyngba u Robinson Singh uwa da dat yaka bol dei khlieh haka minit wa 13 tangwa hapoh 5 minit, ka Lajong da su kylliang ko hadien wa chah beh u Sunil B uwa da kah ya ka bol wow psiah ko ha tre kool deiwa pynemkaam dei kti kawa chut da u Figo Syndai, kamtæ ka Lajong da yoh ko yaka Penalty kawa da thap da u Hardy Cliff Nongbri uwa man leh kam u Captain.
Deiwa yalehke pyrchah ya 10 ngut, ka Lajong ym ye ko wow chim kabu heiwa ka TRAU da hun ko wow khanglaad cha liang yong ki dei thmu wow pynkut yaka yalehke khlem em wa jop.
Tangwa haka minit wa 85, ka Lajong da yoh ko yei jop hadien wa u Everbrightson Sana da yoh laad u wow toor chakhmat wei hawa pyrchang wow khanglad ya u Hardy Cliff, neiliang u Thomas Singh da thap bakla u pyn cha ka liang yong oo hi.
Da ini, ka Lajong kattu da jop ko 3 sien wei da ya Drawn 3 sien na 6 tylli ki yalehke wei kattu u mih noh ki na Shillong yow yachem waka Rajasthan United haka 3 tarik u bnai wow wan heipor 4:30 noh chariñ ka sngi ha Deccan Arena, Hyderabad.
Discussion about this post