Ka Lion Sports & Youth Affairs da jop ko da 7 Wicket ya ka Friends United XI ynne ka sngi ha ka Open to All Cricket Tournament 2023 wa da pyman da ka West Jaiñtia Hills District Cricket Association Jowai ha Madan Khliehtyrshi Mini Stadium.
Ya ka kylla khlem da jop da ka United XI heiwa da jied ko u Bat nyngkong wei da kamai ko 116 Run na ki 24.5 Over deiwa dooh lut waroh ki Wicket. Da kamai boon da u Marle Lathong 28 Run na 31 bol wa u Marshall Pariat 24 Run na 28 bol katwa neiliang kiwa kawang bol ka Lion da yoh boon Wicket dooh da u Deibormi Rangad 6 Wicket na ki 6.5 Over wa u Namewanki Pakyntein 2 Wicket na 4 Over.
Ka Lion Sports & Youth Affairs hawa beh ya ka thong da jop ko deiwa yoh 122 Run ha ka 16.1 Over wei da dooh ki 3 Wicket deiwa lehbha u Firstbornson Dkhar 35 Run na 25 bol wa u Mewan Phawa 21 Run na 42 bol, katwa na kiwa kawang bol ka Friends United XI won kiwa yow Wicket toh u Pura Shadap, u Shwamiki Paswet wa u Monjurlang Suchiang kiwa da yoh mar chi Wicket.
Yei naam Man of the Match da yoh da u Deibormi Rangad yong ka Lion Sports & Youth Affairs.
