Ka Lumphyrnai Sohphoh da yoh ko yei naam Champion ka Kesilroy Pala Memorial Trophy 2025 kawa man leh ka Super Division ka Thadlaskein Sports Association (TSA) deiwa pynrem ko ya ka Mukhla Raij da ka yachut Tie-Breaker da 4-3 hadien wa kut ka yalehke da 1-1.
Ya ka Lumphyrnai Sohphoh da yoh wow thap kool da u Pynbiang Mynsong ha ka minit wa 60 katwa ya ka Mukhla Raij da thap da u Welcome Sari ha ka minit wa 50.
Ha kani ka sngi da saam leh yei naam Top Scorer wa da yoh rah da u Sumar Suting na ka Lumphyrnai Sohphoh, yei naam Best Goalkeeper da yoh u Banshan Mukhim na ka Mukhla Raij katwa yei naam Best Player da yoh u Pynbiang Mynsong na ka Lumphyrnai Sohphoh.
Ya kani ka yakhun Final da wan wow sakhi da u Deputy Chief Minister, u Sniawbhalang Dhar kam u kongsan chirup wa u Hamletson Dohling, President ka MFA kam u symbood kongsan deiwa emlang leh u DSO ka West Jaiñtia Hills, u Khroobok Passah, u Wailadmiki Shylla, Montri ka chnat Sports, ki MDC, kiwa kitkaam ka MFA wa ki paidbah wa duna 5000 ngut wa wan.
Hawa e yei klam, neiliang u Sniawbhalang Dhar da yaroh u ya kiwa kitkaam ka TSA kiwa da ye u pynkhai im biang ya ka hadien da ki phaw snem wa da wiar ko, heijooh i por leh da pynbna u wa ha ka Super Division ka TSA wa daw pynman ha u snem wow wan, daw pynman noh ka dei miet, neibhah hapoh kini ki 4-5 bnai u chna noh ya ki Floodlights hapoh kani ka Wahiajer Multisports Complex.
Neiliang won u Hamletson Dohling da yaroh u ya ka TSA wa da ye ko u pynlai bait ya kani ka lympung yalehbol nadooh ka 2nd Division, 1st Division, Super Division heijooh i por da ong u wa kawa jop na ka TSA u yoh ko u mihkhmat cha ka Meghalaya State League kawa daw pynman ha uni u snem.
Da yoh leh yei klam na u President ka TSA, u Kmenlang Shylla wei ya ka yalang da pynlai da u Eberist Pariat, Vice President ka TSA wei ya ki khusnaam da saam da u Wailadmiki Shylla wa kamjooh da u Hamletson Dohling.
Discussion about this post