Ka MC Mary Kom da jop ko yaka yakhun Final haka kyrdan 51kg pyrchah yaka Nikhat Zareen wa pynman ynne kawa man leh wow yohlaad u yakhun wow mihkhmat yaka India haka 2020 Tokyo Olympics heiwa daw pynman chwa yaka Olympics Qualifiers ha Wuhan, China ha u Thohlakhmi (Feb) nadooh ka 3 hadooh ka 14 tarik.
Hadien wa rah u Referee yei kti ka Mary Kom kam kawa jop, ka Kom ymbien ko wow khublei ya i kti yong ka Zareen kam ka rukom wa jooh leh manda kut ka yalehke heiwa da mih i pyrchah neiliang kiwa em waka Zareen.
Hadien ini da mih i huri hura neidaw wym bien kiwa kyrchaan ka Zareen wow pdiang ya ini deiwa pynbaad waka Boxing Federation of India (BFI) man ko kawa yachah chilliang. Da hap wan da u President ka BFI u Ajay Singh yow pyn jai-jai ya ini yow ye u pteiñ ya kiwi ki yalehke ki kyrdan waphær waphær.
Ka yakhun ym em man ko kamwa da yooluti kiwa boon wei ym em man ko iwa eh yaka Kom wow jop heiwa da jop suk ko deiwa yoh 9-1 na ki 10 ngut ki Judge.
Kani ka yakhun toh kawa da kwah bha kiwa boon u yoo hadien waka Zareen da kam ko wa ka Kom daw yoh ko u pisah bait cha ka Olympic Qualifiers hanlada katkam ki kyndon ka BFI da ong wa hap wow pynman yaka yaleh wow jied namo ka Trial. Ka Zareen da dawa ko ya kani ka Trial ha kini ki le bnai.
Ka Zareen da sdang ko wow dawa ya kani ka yakhun (Trial) haka 51kg ha u Naisaphra (August) hadien wa ka BFI da chah ko yaka Kom wow chimbynta ko haka World Championships khlem da pynman yaka Trial. Hadien ka World Championships heiwa ka Kom da jop ko yaka takma tama (Bronze Medal), ka BFI da ong ko wa ka Kom ym duk ko wow yaleh Trial yow lai chimbynta cha ka Olympic Qualifiers, hanlada ka Federation da em ko ki kyndon wa du kiwa yoh yaka Silver Medal chaneiñ u lait ki u chimbynta haka Trial.
Ka Zareen, 23 (snem) da ong ko wa sñiawsih ko yei rukom leh ka Mary hadien wa kut ka yakhun heiwa da pyrchang ko wow kdung ka tangwa ka Mary ym bien ko.
Ka Mary hadien wa kut ka yakhun da ong ko wa ka bood ko katkam ki kyndon wa booh wa phah daka BFI, deiwa ong wa hadien ka World Championships, ka leh sñiawphylla ko wa ym duk ko wow yaleh yaka Trial hanlada man ko kawa da pynkhreh.
“I da pynman i yaka Trial kawa khooid kawa ym em leh chilliang, da em leh 10 ngut ki Judge wei da khut leh ya ki laad pathai khubor wow wan sakhi ki wei da riñ dur leh yaki yakhun.” Da ong u Singh.
Discussion about this post