Shillong: U Abhay Negi da yoh u yaka 50 Run kawa 5 hei smat dooh wow yoh haka T20 Cricket heiwa yeini da man u uwa 5 uwa ksoh lang ya ini i naam hawa jop ka Meghalaya yaka Mizoram da 25 Run haka Syed Mushtaq Ali Trophy ha Mumbai ynne ka sngi.
Ka Meghalaya da poi ko 149/4 haka 17 Over heipor wa wan Bat u Negi, uwa man uwa kawang bol ym toh uwa tip kam uwa Bat. U Negi da yoh u 50 Run na ki 14 tylli ki bol, kawa boon ar tylli ki bol kawa ye u Yuvraj Singh wow booh yaka Record pyrchah yaka England ha u 2007. Kawa leh won u Negi da man ko leh ka 50 Run wa smat dooh haka Syed Mushtaq Ali Trophy.
U Negi da dat u 2 tylli ki 4 Run wa 4 tylli ki 6 Run deiwa ym em haap ka Wicket u yow pynpoi yaka Meghalaya 207/4 na ki 20 Over, heiwa 58 Run da mih ki na ki le Over wa khaddooh.
U Ravi Teja da leh bha u da ka Bat deiwa kamai 53 Run na ki 31 bol khlem haap ka Wicket u deiwa dat u 5 tylli ki 4 Run wa 2 tylli ki 6 Run.
Ka Mizoram hawa kdong ko ya i thong da pynkuslai ko yaka Meghalaya heiwa u Taruwar Kohli da kamai u 90 Run wei da yoh lok u wa u Pawan Prasad (72 Not Out), tangwa ka Mizoram ym em poi thong ko wei da kut i kdong ko da 182/2.
Ka Meghalaya da pynemkaam ko 8 ngut kiwa kawang bol wei da yoh Wicket du u Raj Biswa (1/29) wa u Negi (1/43).
Discussion about this post