Ynne ka sngi ka lympung 1st Invitation Knockout Football Tournament wa pynman da ka JSU Shangpung Unit da poi ko chawa kut heiwa da wan sakhi da u Treibor R Suchen, u General Secretary ka JSU kam u kongsan hei emlang u Waheh Chnong ka Shangpung Pohshnong kam u symbood kongsan.
Ka yakhun Final da man ko hapyrdi ka Moosyiem Cultural Sports Club pyrchah ya ka Shangpung Koira FC (SKFC) heiwa ka Moosyiem Cultural Sports Club da jop ko da 1-0 lyngba ka kool wa thap da u Eijingmut Lyngdoh.
Ya i naam Best Player da yoh da u Eijingmut Lyngdoh wei ya i naam Best Goalkeeper da yoh u Arundel Suchiang.
Ya ka yalang wa tbian da pynlai da u Bantei Sungoh heiwa da yoh leh i klam na u kongsan u Treibor R Suchen uwa da beiñ ya ka sorkar hajrong i ieh khonswet ya kiwa yalehke ha ka lympung Meghalaya Games deiwa dawa wow pynkrehkaam noh ya ka Sports & State Youth Policy hapoh ka jylla wow myntoi ki khynnah kiwa em sap wow pynjanai ki yei sap yong ki.
Ha kani ka sngi da yoh leh i klam na u Waheh Chnong ka Shangpung Pohshnong uwa da ong wa i yalehke Sports toh iwa e yei chait i khiah.
Da yoh leh i klam na u Chibaitmi Langstang, u Coach ka West Jaiñtia Hills District Taekwondo Association (WJHDTA) uwa da ong wa kiwa yalehke emkaam wow yait ki na ki jait dih pynmuaid wa boonjait khnang wow yoh ya ka mynried wa tyrchaaiñ.
Da yoh leh i klam na u khloor yaleh Kickboxing u Hameshaniah Suiam uwa da yoh ya ka U Kiang Nangbah Award uwa da ong wa kiwa yalehke emkaam u lehke bha ki neibhah ha ka juk wa katni ka Sports toh kawa e kreh.
Da yoh leh i klam na u Dapmain Suchiang, u President ka JSU Lakeiñ Circle wei da wan sakhi leh da ka MPUF Shangpung Unit wa kiwi kiwi.
Da e ya ki kyntien khublei na u Leki S. Manner, u Organising Secretary ka seiñ.
